ប្រធានាធិបតីប្រេស៊ីលនិយាយថា ក្រុមប្រទេសសមាជិក BRICS នៃបណ្តាប្រទេសដែលមានសេដ្ឋកិច្ចកំពុងរីកចម្រើនសំខាន់ៗទើបតែបានបញ្ចប់កិច្ចប្រជុំកំពូលដ៏សំខាន់បំផុតរបស់ខ្លួនកាលពីថ្ងៃចន្ទ។

ប៉ុន្តែអ្វីដែលត្រូវបានគេចាត់ទុកថាជាការបង្ហាញកម្លាំងនិងឯកភាពជាប្រវត្តិសាស្ត្រ បានបញ្ចប់ដោយភាពតានតឹងបន្ទាប់ពីប្រធានាធិបតី Donald Trump បានគំរាមដំឡើងពន្ធថ្មី និងការប្រកាសដំឡើងពន្ធលើប្រទេសចំនួន១៤កាលពីថ្ងៃចន្ទ ។ លោកបានសរសេរលើបណ្ដាញសង្គម Truth Social ថា ប្រទេសណាក៏ដោយដែលចូលរួមជាមួយគោលនយោបាយប្រឆាំងអាមេរិករបស់ក្រុមប្រទេស BRICS នឹងត្រូវបានគិតថ្លៃបន្ថែម១០% ហើយនឹងពុំមានការលើកលែងចំពោះគោលនយោបាយនេះទេ។

ការគំរាមរបស់លោក Trump បានទាក់ទាញយ៉ាងឆាប់រហ័សពីប្រធានាធិបតីប្រេស៊ីលលោក Luiz Inácio Lula da Silva ដែលជាម្ចាស់ផ្ទះនៃកិច្ចប្រជុំកំពូលនេះ ហើយបានហៅការអត្ថាធិប្បាយរបស់លោក Trump ថាពុំមានការប្រុងប្រយ័ត្ន ហើយថាការគំរាមដំឡើងពន្ធរបស់លោក Trumpជាទង្វើគ្មានភាពទទួលខុសត្រូវ។

លោក Lula បាននិយាយក្នុងសុន្ទរកថាបិទកាលពីថ្ងៃចន្ទថា យើងមិនត្រូវការអធិរាជទេ យើងជាប្រទេសមានអធិបតេយ្យ នេះជារឿងមិនត្រឹមត្រូវសម្រាប់ប្រធានាធិបតីនៃប្រទេសមួយទំហំដូចជាសហរដ្ឋអាមេរិក មកគំរាមពិភពលោកតាមអនឡាញ។

កិច្ចប្រជុំកំពូល BRICS ប្រចាំឆ្នាំ ដែលប្រមូលផ្តុំសមាជិកស្ថាបនិក ប្រេស៊ីល រុស្ស៊ី ឥណ្ឌា ចិន អាហ្រ្វិកខាងត្បូង បូករួមទាំងសមាជិកថ្មី រួមទាំងឥណ្ឌូនេស៊ី អេត្យូពី និងអ៊ីរ៉ង់ មានបំណងបង្ហាញជម្រើសរបស់ប្រទេសមានសេដ្ឋកិច្ចលូតលាស់សកលខាងត្បូង(Global South)ទៅកាន់លោកខាងលិច។

សមាជិកស្ថាបនិក BRICS អាហ្រ្វិកខាងត្បូងក៏បានចូលរួមក្នុងជម្លោះជាមួយលោក Trump ផងដែរ។ លោកប្រធានាធិបតី Cyril Ramaphosa បានប្រាប់អ្នកសារព័ត៌មាននៅឯកិច្ចប្រជុំកំពូលថា អ្នកមានអំណាចមិនគួរស្វែងរកការសងសឹកប្រឆាំងនឹងអ្នកដែលធ្វើការដើម្បីភាពល្អនៅក្នុងពិភពលោកទេ។ ប្រទេសចិនបានថ្កោលទោសការប្រើប្រាស់ការដំឡើងពន្ធ ជាការបង្ខិតបង្ខំការទូត៕