មនុស្ស ១០នាក់ ក្នុងនោះមានក្មេងស្រីម្នាក់ បានរងរបួស នៅក្នុងការវាយប្រហារតាមអាកាសរបស់អ៊ីស្រាអែលនៅយប់ថ្ងៃអាទិត្យ ទៅលើភាគខាងត្បូង និងភាគខាងកើតប្រទេសលីបង់។ នេះបើយោងតាមសេចក្តីថ្លែងការណ៍ចេញផ្សាយដោយក្រសួងសុខាភិបាលលីបង់កាលពីថ្ងៃចន្ទ។

សេចក្តីថ្លែងការណ៍ បានបញ្ជាក់ថា៖«ការវាយប្រហារតាមអាកាសរបស់អ៊ីស្រាអែលដែលជាសត្រូវ ទៅលើទីប្រជុំជន Borj Rahal ក្នុងស្រុក Tire ដែលមានទីតាំងនៅផ្នែកខាងលិចនៃភាគខាងត្បូងប្រទេសលីបង់ បានបណ្តាលឲ្យជនស៊ីវិល ៩នាក់ រងរបួស»។



សេចក្តីថ្លែងការណ៍ បានបន្ថែមថា៖«ការវាយប្រហារតាមអាកាសរបស់អ៊ីស្រាអែលមួយផ្សេងទៀតលើទីក្រុង al-Zarariyeh បានធ្វើឲ្យក្មេងស្រីវ័យក្មេងម្នាក់ រងរបួសយ៉ាងធ្ងន់ធ្ងរ ដោយតម្រូវឲ្យបញ្ជូននាងទៅកាន់មន្ទីរពេទ្យ ដើម្បីព្យាបាល។

យោងតាមប្រភពផ្លូវការ និងសន្តិសុខនៅក្នុងប្រទេសលីបង់ យន្តហោះចម្បាំងរបស់អ៊ីស្រាអែល បានបើកការវាយប្រហារតាមអាកាសប្រហែល ២០លើក នៅពេលយប់ ដោយកំណត់គោលដៅទៅលើតំបន់ធំទូលាយ នៅភាគខាងកើត និងភាគខាងត្បូងនៃប្រទេសនេះ ដោយផ្តោតសំខាន់លើទីតាំងដែលគេសង្ស័យថា ជារបស់ក្រុមហេសបូឡា។

ទីភ្នាក់ងារសារព័ត៌មានជាតិផ្លូវការរបស់លីបង់ (NNA) បាននិយាយថា ការវិវឌ្ឍនេះ «គឺជាការបំពានថ្មីលើ សេចក្តិសម្រេចរបស់អង្គការសហប្រជាជាតិ និងបន្ថែមទៅលើការបំពានជាបន្តបន្ទាប់របស់អ៊ីស្រាអែល នៅភាគខាងត្បូងប្រទេសនេះ។

ទីភ្នាក់ងារសារព័ត៌មាននេះ បានបន្ថែមថា កងទ័ពលីបង់ និងកងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ កំពុងតាមដានយ៉ាងដិតដល់នូវការរំលោភបំពាននេះ ដើម្បីចាត់វិធានការសមស្រប។