មេបញ្ជាការកងជីវពលក្នុងតំបន់ និងជាព្រឹទ្ធាចារ្យម្នាក់ បាននិយាយកាលពីថ្ងៃចន្ទថា ការប្រយុទ្ធគ្នា កំពុងបន្តរវាងកងកម្លាំងប្រដាប់អាវុធរបស់ប្រទេសសូម៉ាលី និងក្រុមសកម្មប្រយុទ្ធអាល់សាបាប (Al-Shabab) ដណ្តើមគ្រប់គ្រងទីក្រុងយុទ្ធសាស្ត្រមួយ ក្នុងតំបន់ភាគកណ្តាលរបស់ប្រទេសនេះ។ 



ការវាយប្រហារកាន់តែខ្លាំងឡើងដោយក្រុមដែលមានទំនាក់ទំនងនឹងអាល់កៃដា រួមទាំងការវាយប្រហារលោកក្បួនរថយន្តរបស់លោកប្រធានាធិបតី Hassan Sheikh Mohamud កំពុងបង្កឲ្យមានការព្រួយបារម្ភអំពីការងើបឡើងវិញនៃក្រុមជ្រុលនិយម នៅក្នុងប្រទេសញកអាហ្វ្រិក (Horn of Africa) បន្ទាប់ពីក្រុមសកម្មប្រយុទ្ធ ត្រូវបានបង្ខំឲ្យត្រឡប់មកវិញ ក្នុងប៉ុន្មានឆ្នាំថ្មីៗនេះ។

មេបញ្ជាការកងជីវពលក្នុងតំបន់ លោក Abdulahi Adan បាននិយាយថា ក្រុមសកម្មប្រយុទ្ធ Al-Shabab បានវាយប្រហារ ទៅលើទីក្រុង Moqokori ដែលមានចម្ងាយប្រហែល ៣០០ គីឡូម៉ែត្រភាគខាងជើងនៃរដ្ឋធានីម៉ូហ្គាឌីស្យូ (Mogadishu) ជាមួយនឹងរថយន្តផ្ទុកដោយគ្រឿងផ្ទុះ និងយុទ្ធជនរាប់រយនាក់»។

លោកបាននិយាយថា កងជីវពលនៅក្នុងទីក្រុងនេះ បាន«ដកថយដោយយុទ្ធសាស្ត្រ» ប៉ុន្តែបានបន្ថែមថា «នៅតែមានការប្រយុទ្ធគ្នាជាបន្តបន្ទាប់ នៅក្នុងតំបន់ ដូច្នេះនេះមិនមែនជាការកាន់កាប់ពេញលេញទេ»។

លោក Yusuf Mohamed ដែលជាព្រឹទ្ធាចារ្យម្នាក់នៅទីក្រុង Mahas ក្បែរនោះ បាននិយាយថា៖«ទាហានដែលរងរបួសជាច្រើននាក់ និងយុទ្ធជនជីវពលសហគមន៍ ត្រូវបានបញ្ជូនទៅកាន់មន្ទីរពេទ្យនៅទីក្រុង Mahas ដើម្បីព្យាបាល»។