នាយកនៃមូលនិធិជនរងគ្រោះ និងកិច្ចការអតីតយុទ្ធជនរបស់អ៊ីរ៉ង់ លោក Saeed Ohadi បាននិយាយថា ចំនួនអ្នកស្លាប់ដោយសារការវាយប្រហាររបស់អ៊ីស្រាអែលលើអ៊ីរ៉ង់ បានកើនឡើងដល់ ១.០៦០នាក់  ហើយ។

លោកបានប្រាប់ទូរទស្សន៍រដ្ឋរបស់ប្រទេសនេះថា៖«គិតត្រឹមថ្ងៃចន្ទ យើងបានកប់មនុស្សចំនួន ១.0៦០នាក់ ដែលបានស្លាប់ដោយសារការវាយប្រហាររបស់របបអ៊ីស្រាអែលទៅលើប្រទេសអ៊ីរ៉ង់»។

នៅព្រឹកព្រលឹមថ្ងៃទី១៣ មិថុនា អ៊ីស្រាអែលបានបើកប្រតិបត្តិការយោធាប្រឆាំងនឹងអ៊ីរ៉ង់។ រយៈពេលតិចជាង ២៤ម៉ោង ក្រោយមក អ៊ីរ៉ង់បានវាយប្រហារសងសឹក។ រយៈពេល ៩ថ្ងៃក្រោយមក គឺនៅព្រឹកថ្ងៃទី២២ ខែមិថុនា យន្តហោះចម្បាំងអាមេរិក បានវាយប្រហារទីតាំងនុយក្លេអ៊ែរអ៊ីរ៉ង់ចំនួនបី ដោយបានចូលរួមក្នុងជម្លោះ។នេះ នៅល្ងាចថ្ងៃទី២៣ ទីក្រុងតេអេរ៉ង់ បានបើកការវាយប្រហារដោយមីស៊ីលទៅលើមូលដ្ឋាន Al Udeid ដែលជាមូលដ្ឋានទ័ពអាកាសដ៏ធំបំផុតរបស់សហរដ្ឋអាមេរិកនៅក្នុងតំបន់ មានទីតាំងនៅប្រទេសកាតា។ បើតាមអាជ្ញាធរអាមេរិក មិនមានអ្នកស្លាប់ ឬខូចខាតអ្វីគួរឲ្យកត់សម្គាល់ទេ។

ក្រោយមក ប្រធានាធិបតីអាមេរិក លោក ដូណាល់ ត្រាំ បានប្រកាសថា អ៊ីស្រាអែល និងអ៊ីរ៉ង់ បានយល់ព្រមលើបទឈប់បាញ់ទាំងស្រុង ដែលបានចូលជាធរមាន នៅថ្ងៃទី២៤ ខែមិថុនា។