ក្រុមឃ្លាំមើលសកម្មភាពតាំងទីលំនៅរបស់អាជ្ញាធរប៉ាឡេស្ទីន បានរាយការណ៍ថា អាជ្ញាធរអ៊ីស្រាអែលកាលពីថ្ងៃចន្ទ បានរឹបអូសយកដីទំហំ ៧៧,៤ ហិកតា នៅភាគឦសានទីក្រុងរ៉ាម៉ាឡា (Ramallah) ដែលជារដ្ឋធានីរដ្ឋបាល នៅតំបន់វេសបែង ( West Bank)។

គណៈកម្មាការតស៊ូនិងដោះស្រាយការតាំងទីលំនៅរបស់ប៉ាឡេស្ទីន បាននិយាយថា ដីនៅក្នុងភូមិ Al-Mughayir និង Jabait ត្រូវបានប្រកាសថា ជា «ដីរដ្ឋ»ដើម្បីធ្វើការរឹបអូសយកកាលពីថ្ងៃចន្ទ មានភាពត្រឹមត្រូវ។

គណៈកម្មាការនេះ បានបន្ថែមថា អាជ្ញាធរអ៊ីស្រាអែល បានដាក់បញ្ចូលតំបន់ដែលចាប់បានថ្មីទៅ ក្នុងទីកន្លែងតាំងទីលំនៅ Malakhi HaShalom ដែលជាការតាំងទីលំនៅខុសច្បាប់របស់អ៊ីស្រាអែល ដែលបានបង្កើតឡើង ក្នុងឆ្នាំ ២០១៥ នៅលើដីដែលជាកម្មសិទ្ធិរបស់ភូមិ Al-Mughayir ។ រដ្ឋាភិបាលស្តាំនិយមជ្រុលអ៊ីស្រាអែល នៅឆ្នាំ ២០២៣ បានប្រកាសពីផែនការ ដើម្បីធ្វើឲ្យកន្លែងតាំងទីលំនៅ Malakhi HaShalom និងពង្រីកទឹកដីរបស់ខ្លួន ស្របច្បាប់។

គណៈកម្មាការបានរាយការណ៍ថា ការចាប់យកដីសរុបរបស់អ៊ីស្រាអែលដែលត្រូវបានចាត់ថា ជា «ដីរដ្ឋ» ចាប់តាំងពីដើមឆ្នាំ ២០២៣ ត្រូវបានគេប៉ាន់ប្រមាណថា មានចំនួន ៦.៣៨១ ហិកតា។

អ្នកតាំងលំនៅជាង ៧០០.000នាក់ រស់នៅ ក្នុងតំបន់វេសបែង ជាកន្លែងដែលរដ្ឋាភិបាលអ៊ីស្រាអែល បានរក្សាការកាន់កាប់ដោយយោធា ចាប់តាំងពីខែមិថុនា ឆ្នាំ១៩៦៧។ ការពង្រីកការតាំងទីលំនៅ ត្រូវបានគេមើលឃើញជាយូរមកហើយថា ជាឧបសគ្គដល់ការបង្កើតរដ្ឋប៉ាឡេស្ទីន និងការដោះស្រាយជម្លោះអ៊ីស្រាអែល  និងប៉ាឡេស្ទីន។