រដ្ឋមន្ត្រីការបរទេសបេឡារុស លោក Maxim Ryzhenkov បាននិយាយថា ប្រទេសនេះ ថ្កោលទោសការដាក់ទណ្ឌកម្មសេដ្ឋកិច្ច ដែលជំរុញដោយហេតុផលនយោបាយ ថាជាទង្វើខុសច្បាប់ និងគ្រោះថ្នាក់បំផុត។

ក្រសួងការបរទេសបេឡារុស បានដកស្រង់សម្តីរបស់លោកដែលថ្លែងនៅឯកិច្ចប្រជុំកំពូល BRICS ស្តីពីបញ្ហាបរិស្ថាន ការប្រែប្រួសអាកាសធាតុ និងការថែទាំសុខភាពសកលថា៖«ខ្ញុំចង់ទាញការយកចិត្តទុកដាក់ម្តងទៀតចំពោះបញ្ហានៃទណ្ឌកម្មសេដ្ឋកិច្ច និងវិធានការបង្ខិតបង្ខំឯកតោភាគីដែលដាក់ដោយរដ្ឋមួយចំនួន ដោយផ្អែកលើហេតុផលនយោបាយ។ ខ្ញុំទទូចថា វិធីសាស្រ្តបែបនេះ គឺខុសច្បាប់ និងគ្រោះថ្នាក់ ជាពិសេសនៅពេលយើងដោះស្រាយជាមួយបាតុភូតឆ្លងព្រំដែន និងពិភពលោក ដូចជាការប្រែប្រួលអាកាសធាតុ ជំងឺរាតត្បាត និងកត្តាផ្សេងៗទៀត ដែលគំរាមកំហែងដល់អាយុជីវិត និងសុខភាពរបស់ប្រជាជន»។

លោករដ្ឋមន្ត្រី បានសង្កត់ធ្ងន់ថា ការដាក់ទណ្ឌកម្មរារាំងដល់លទ្ធភាពទទួលបានការវិនិយោគ និងបច្ចេកវិទ្យា ដែលអាចនឹងត្រូវប្រើប្រាស់ ដើម្បីកាត់បន្ថយផលប៉ះពាល់នៃការប្រែប្រួលអាកាសធាតុ ការពារបរិស្ថាន និងប្រយុទ្ធប្រឆាំងនឹងជំងឺគ្រោះថ្នាក់ផ្សេងៗ។ លោកបានបញ្ជាក់ថា៖«គោលនយោបាយបែបនេះ មិនត្រឹមតែធ្វើឲ្យប៉ះពាល់ដល់កិច្ចខិតខំប្រឹងប្រែងរបស់ប្រទេសបេឡារុសប៉ុណ្ណោះទេ ថែមទាំងការខិតខំប្រឹងប្រែងរបស់សហគមន៍អន្តរជាតិទាំងមូល ក្នុងការដោះស្រាយបញ្ហាសកលលោកផងដែរ»។