ភ្នំភ្លើង Lewotobi Laki Laki របស់ប្រទេសឥណ្ឌូនេស៊ី បានផ្ទុះឡើងយ៉ាងខ្លាំងចំនួន ២លើកជាថ្មីម្ដងទៀតកាលពីថ្ងៃចន្ទ (០៧ កក្កដា) ដោយបានបញ្ជូនសំណុំផេះក្ដៅគគុក និងខ្មួលខ្មាញ់ មានកម្ពស់ដល់ទៅ ១៨គីឡូម៉ែត្រ ឡើងលើផ្ទៃមេឃ បណ្ដាលឱ្យផ្សែងផេះហោះទៅគ្របលើភូមិនានា និងនាំឱ្យមានការលុបចោលជើងហោះហើរជាច្រើន។

មិនមានអ្នករងរបួសត្រូវបានរាយការណ៍ភ្លាមៗនោះទេ។ ភ្នំភ្លើងនៅលើកោះ Flores កំពុងស្ថិតក្នុងកម្រិតប្រកាសអាសន្នខ្ពស់បំផុតចាប់តាំងពីការផ្ទុះឡើងលើកមុននៅថ្ងៃទី១៨ ខែមិថុនា ហើយតំបន់គ្រោះថ្នាក់ ត្រូវបានបង្កើនទ្វេដងដល់កាំ ៧គីឡូម៉ែត្រ ដោយសារការផ្ទុះកាន់តែញឹកញាប់។

ទីភ្នាក់ងារភូគព្ភសាស្ត្រឥណ្ឌូនេស៊ី បានកត់ត្រាសំណុំឧស្ម័នដែលលាយឡំជាមួយកម្ទេចថ្ម និងកម្អែភ្នំភ្លើង ដែលធ្វើដំណើររហូតដល់ ៥គីឡូម៉ែត្រ ចុះពីលើជម្រាលភ្នំ ១.៥៨៤ម៉ែត្រ។ លោក Muhammad Wafid ប្រធានទីភ្នាក់ងារភូគព្ភសាស្ត្រ និយាយថា "ការផ្ទុះនៃទំហំនោះពិតជាមានសក្តានុពលខ្ពស់ណាស់សម្រាប់គ្រោះថ្នាក់ រួមទាំងផលប៉ះពាល់លើអាកាសចរណ៍"។

គួរឱ្យដឹងថា ឥណ្ឌូនេស៊ី ជាប្រជុំកោះដែលមានប្រជាជនជាង ២៨០លាននាក់ មានសកម្មភាពរញ្ជួយដីញឹកញាប់ណាស់ ដោយមានភ្នំភ្លើងបន្ទុះសកម្ម ១២០ភ្នំ ហើយស្ថិតនៅតាមបណ្តោយ "តំបន់កងភ្លើងប៉ាស៊ីហ្វិក" ដែលជាខ្សែបន្ទាត់រញ្ជួយដីព័ទ្ធជុំវិញអាងប៉ាស៊ីហ្វិក៕