ប្រទេសស៊ែរប៊ីកំពុងប្រយុទ្ធទប់ស្កាត់ការកើនឡើងចំហេះព្រៃ ដែលបណ្តាលមកពីកម្តៅ និងខ្យល់បក់ខ្លាំង ជំរុញឱ្យតំបន់ជាច្រើនប្រកាសស្ថានភាពរដ្ឋក្នុងគ្រាអាសន្ន និងបានដាក់ពង្រាយកងកម្លាំងយោធា។ ក្រសួងមហាផ្ទៃបាននិយាយថា ចំហេះព្រៃជាង២០០កន្លែង ត្រូវបានរាយការណ៍ក្នុងរយៈពេល២៤ម៉ោងចុងក្រោយនេះ ដោយមនុស្សម្នាក់បានស្លាប់ និងយ៉ាងហោចណាស់១៤នាក់បានរងរបួស។

រដ្ឋក្នុងគ្រាអាសន្ន ត្រូវបានប្រកាសនៅក្នុងក្រុងKursumlija ភាគខាងត្បូងនិងនៅក្រុង Bor ភាគខាងកើតជាកន្លែងដែលមានចំហេះព្រៃខ្លាំងបំផុត។ កងកម្លាំងប្រដាប់អាវុធប្រទេសស៊ែរប៊ី បានចូលរួមក្នុងកិច្ចខិតខំ ពន្លត់អគ្គិភ័យដោយប្រើប្រាស់ឧទ្ធម្ភាគចក្រ រថយន្តពន្លត់អគ្គិភ័យ និងឧបករណ៍ឯកទេស។ 

ដោយធ្វើការជាមួយអាជ្ញាធរក្នុងតំបន់ ក្រុមអ្នកពន្លត់អគ្គិភ័យនិងអ្នកស្ម័គ្រចិត្ត បានគ្រប់គ្រងចំហេះព្រៃជាច្រើនកន្លែងនៅភាគខាងត្បូងប្រទេសស៊ែរប៊ី ទោះបីជាចំណុចចំហេះព្រៃជាច្រើនកន្លែងទៀតនៅតែសកម្មក៏ដោយ។

នៅក្នុងទីក្រុង Bor ជាទីក្រុងល្បីដោយសារឧស្សាហកម្មរ៉ែ ចំហេះព្រៃកំពុងឆេះរាលដាលលើផ្ទៃដីជាង ១០០ហិកតា។ ក្រុមសង្គ្រោះបន្ទាន់ ដែលគាំទ្រដោយក្រុមហ៊ុនក្នុងស្រុក រួមទាំងក្រុមហ៊ុន Zijin Mining ដែលដំណើរការដោយជនជាតិចិន កំពុងប្រយុទ្ធទប់ស្កាត់អណ្តាតភ្លើងនៅក្នុងស្ថានភាពដែលមានខ្យល់បក់ខ្លាំង។