លោក Donald Trump បានផ្ញើលិខិតទៅកាន់ប្រទេសចំនួន ១៤ ដែលភាគច្រើននៅតំបន់អាស៊ី ដោយជូនដំណឹងដល់ប្រទេសទាំងនោះថា អត្រាពន្ធនាំចូលខ្ពស់ជាងមុន នឹងចូលជាធរមាននៅថ្ងៃទី១ ខែសីហា ប្រសិនបើមិនមានកិច្ចព្រមព្រៀងជាមួយសហរដ្ឋអាមេរិកទេនោះ។ នេះគឺជាលើកទី២ ហើយ ដែលប្រធានាធិបតីអាមេរិក បានកំណត់ពេលវេលាជាថ្មីម្ដងទៀត បន្ទាប់ពីលោកបានពន្យារពេលវិធានការពន្ធលើប្រទេសស្ទើរតែទាំងអស់ ក្នុងខែមេសា រយៈពេល ៩០ថ្ងៃ។

ប្រទេសដែលមានអតុល្យភាពពាណិជ្ជកម្មក្នុងទំហំខ្ពស់ជាមួយសហរដ្ឋអាមេរិក គឺជាគោលដៅធំ រួមមានប្រទេសជប៉ុន (អតិរេក ៦៨,៥ពាន់លានដុល្លារ ក្នុងឆ្នាំ២០២៤) កូរ៉េខាងត្បូង (៦៦ពាន់លានដុល្លារ) ថៃ (៤៥,៦ពាន់លានដុល្លារ) និងឥណ្ឌូនេស៊ី (១៧,៩ពាន់លានដុល្លារ)។

កូរ៉េខាងត្បូងដែលរងបន្ទុករួចហើយ សម្រាប់កាតព្វកិច្ចពន្ធលើដែកថែប និងរថយន្តនោះ កំពុងប្រឈមនឹងការដំឡើងពន្ធ ២៥ភាគរយលើការនាំចេញទំនិញផ្សេងទៀតទៅកាន់សហរដ្ឋអាមេរិក ប៉ុន្តែទីក្រុងសេអ៊ូលនៅតែមានសុទិដ្ឋិនិយមយ៉ាងប្រយ័ត្នប្រយែង ក្នុងការឈានដល់កិច្ចព្រមព្រៀងមួយ។

មិនខុសគ្នាដែរ ជាសម្ព័ន្ធមិត្តជិតស្និទ្ធរបស់សហរដ្ឋអាមេរិក និងជាប្រភពនៃការវិនិយោគបរទេសដ៏ធំបំផុត នៅក្នុងប្រទេស ជប៉ុនក៏ត្រូវដោះស្រាយជាមួយនឹងអត្រាពន្ធ ២៥ភាគរយលើឧស្សាហកម្មរថយន្តសំខាន់ៗរបស់ខ្លួន។ បើយោងតាមរបាយការណ៍ប្រព័ន្ធផ្សព្វផ្សាយក្នុងស្រុក បានឲ្យដឹងថា នាយករដ្ឋមន្ត្រីជប៉ុនលោក Shigeru Ishiba បានលើកឡើងនៅក្នុងកិច្ចប្រជុំគណៈរដ្ឋមន្ត្រីកាលពីថ្ងៃចន្ទថា អត្រាពន្ធនៅក្នុងលិខិតនោះ គឺជា «វិធានការដ៏គួរឲ្យសោកស្តាយណាស់»។

នៅក្នុងតំបន់អាស៊ីអាគ្នេយ៍ សហភាពមីយ៉ាន់ម៉ា និងឡាវ ត្រូវប្រឈមនឹងកម្រិតខ្ពស់ដល់ទៅ ៤០ភាគរយ។ នៅបង់ក្លាដែស វិស័យវាយនភ័ណ្ឌរបស់ប្រទេសនេះ កំពុងស្ថិតក្នុងហានិភ័យ ដោយក្រុមហ៊ុនវាយនភណ្ឌធំទី២ របស់ពិភពលោក កំពុងប្រឈមនឹងកម្រិត ៣៥ភាគរយ ប៉ុន្តែទីក្រុងដាកា សង្ឃឹមថា នឹងអាចចុះហត្ថលេខាលើកិច្ចព្រមព្រៀងមួយ នៅដើមខែកក្កដានេះ។ ផលិតកម្មវាយនភណ្ឌ និងកាត់ដេរមានចំនួនប្រហែល ៨០ភាគរយនៃការនាំចេញរបស់ប្រទេសអាស៊ីខាងត្បូងមួយនេះ៕