ភ្នំពេញ៖ ឯកឧត្តម វេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន នារសៀលថ្ងៃទី៤ ខែមករានេះថា នៅថ្ងៃទី១ ខែមករា ឆ្នាំ២០២២កន្លងមកនេះ ទីតាំងឯកជនដែលដំណើរការព្យាបាលជំងឺកូវីដ-១៩ គឺរដ្ឋបាលរាជធានីភ្នំពេញ បានប្រគល់ជូនវិស័យឯកជនវិញ ចប់សព្វគ្រប់ហើយ។ ដោយឡែកទីតាំងមនី្ទរពេទ្យរដ្ឋ និងមណ្ឌលសុខភាព នៅបន្តដំណើរការព្យាបាលជំងឺកូវីដ-១៩ ធម្មតា។
ឯកឧត្តម វេជ្ជបណ្ឌិត ងី មានហេង បន្តទៀតថា សព្វថ្ងៃនេះ ករណីជំងឺកូវីដ-១៩ ទាំងក្នុងរាជធានីភ្នំពេញ និងតាមបណ្តាខេត្តដទៃទៀត គឺស្ទើរតែគ្មានករណីឆ្លង និងស្លាប់នោះទេ ជាពិសេសថ្មីៗនេះប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា បានប្រកាសបិទបញ្ចប់ព្រឹត្តិការណ៍ឆ្លងកូវីដ-១៩ ក្នុងសហគមន៍ ២០ កុម្ភៈ កាលពីថ្ងៃទី២០ ខែធ្នូ ឆ្នាំ២០២១ ហើយរដ្ឋបាលរាជធានីភ្នំពេញ ក៏ប្រគល់មណ្ឌលព្យាបាលជំងឺកូវីដ-១៩ ជូនវិស័យឯកជនវិញរួចរាល់អស់ហើយដែល។
ទន្ទឹមនឹងនោះ អ្នកជំងឺកូវីដ-១៩ ក៏បានផ្ទេរមកកាន់មណ្ឌលព្យាបាលជំងឺកូវីដ-១៩ ស្តាតអូឡាំពិក សរុបរួមគិតត្រឹមថ្ងៃនេះ មូលដ្ឋានរាជធានីភ្នំពេញ មានមនី្ទរពេទ្យរដ្ឋ និងមណ្ឌលសុខភាពព្យាបាលជំងឺកូវីដ-១៩ ចំនួន៦។
ជាការពិតក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស និយាយដោយឡែកក្នុងក្របខណ្ឌរាជធានីភ្នំពេញទាំង១៤ខណ្ឌ ឯកឧត្តម វេជ្ជបណ្ឌិត ងី មានហេង រួមនឹងមន្រី្តក្រោមឱវាទ បានអំពាវនាវ និងអប់រំប្រជាពលរដ្ឋ ទោះបីជាប្រជាពលរដ្ឋណាឈឺក៏ដោយ ក្រោយពីព្យាបាលជំងឺជាសៈស្បើយ ក៏ត្រូវទៅទទួលការចាក់វ៉ាក់សាំងបង្ការជំងឺកូវីដ-១៩ លើកលែងតែឈឺធ្ងន់ធ្ងរចូលក្នុងបន្ទប់សង្គ្រោះបន្ទាន់ បានក្រុមគ្រូពេទ្យមិនអាចចាក់វ៉ាក់សាំងជូនបាន។
ប៉ុន្តែមកដល់ពេលនេះ មន្រី្តសុខាភិបាល នៅតែបន្តអប់រំពួកគាត់ឲ្យទៅទទួលការចាក់វ៉ាក់សាំងបង្ការជំងឺកូវីដ-១៩ ប៉ុន្តែ បើថាបង្ខំពួកគាត់ គឺមិនហ៊ាន និងមិនទាន់ដល់ថ្នាក់ហ្នឹងទេ។ នៅតែអប់រំ និងសូមឲ្យពួកគាត់ស្ម័គ្រចិត្ត ទៅទទួលការចាក់វ៉ាក់សាំងបង្ការជំងឺកូវីដ-១៩។ ជាពិសេសសម្រាប់យុទ្ធនាការចាក់វ៉ាក់សាំងកូវីដ-១៩ ប្រភេទស៊ីណូវ៉ាក់ ដូសជំរុញ ឬដូសទី៣ ជូនដល់កុមារ និងយុវវ័យ ដែលមានអាយុចាប់ពី១២ឆ្នាំ ដល់អាយុក្រោម១៨ឆ្នាំ ក្នុងមូលដ្ឋានរាជធានីភ្នំពេញ បានចាប់ដំណើរការចាក់វ៉ាក់សាំងជូនចាប់ពីថ្ងៃទី៣ ខែមករា ឆ្នាំ២០២២ មានចំនួន៤២ទីតាំង និងមានក្រុមការងារគ្រូពេទ្យក្រោមឱវាទមនី្ទរសុខាភិបាលរាជធានីភ្នំពេញ ជិត៥០០នាក់ សម្រាប់ចាក់វ៉ាក់សាំងជូនកុមារ និងយុវវ័យ៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
