ក្រសួងការបរទេសរុស្ស៊ី បាននិយាយបន្ទាប់ពីកិច្ចប្រជុំរបស់ពួកគេ នៅខាងក្រៅកិច្ចប្រជុំកំពូល BRICS នៅប្រទេសប្រេស៊ីលថា រដ្ឋមន្ត្រីការបរទេសលោក Sergey Lavrov នៃប្រទេសរុស្ស៊ី និងលោក Hakan Fidan នៃប្រទេសទួរគី បានបញ្ជាក់ឡើងវិញនូវការប្តេជ្ញាចិត្តរបស់ពួកគេ ក្នុងការបន្តកិច្ចខិតខំប្រឹងប្រែង ដើម្បីលើកកម្ពស់ដំណោះស្រាយនយោបាយនៃជម្លោះដែលមានស្រាប់ និងបន្ធូរបន្ថយភាពតានតឹងនៅក្នុង     តំបន់។

ក្រសួងបានឲ្យដឹងថា ភាគីទាំងពីរ បានផ្លាស់ប្តូរទស្សនៈអំពីស្ថានភាពអន្តរជាតិបច្ចុប្បន្ន និងបានអះអាងជាថ្មីនូវការប្តេជ្ញាចិត្តរបស់ពួកគេ ក្នុងការសម្របសម្រួលបន្ថែមទៀតរវាងក្រសួងការបរទេសនៃប្រទេសទាំងពីរ ដើម្បីបន្ធូរបន្ថយភាពតានតឹងក្នុងតំបន់ និងលើកកម្ពស់ការដោះស្រាយនយោបាយនៃជម្លោះដែលមានស្រាប់នោះ។

លោករដ្ឋមន្ត្រីទាំងពីរ បានពិភាក្សាលើបញ្ហាសំខាន់ៗលើរបៀបវារៈទ្វេភាគី រួមទាំងការអនុវត្តគម្រោងថាមពល។ ក្រសួងបានបន្ថែមថា៖«ភាគីទាំងពីរ បានវិភាគលើការរំពឹងទុកសម្រាប់ការពង្រីកកិច្ចសហប្រតិបត្តិការក្នុងបរិបទនៃលទ្ធផលនៃកិច្ចប្រជុំលើកទី ១៩ នៃគណៈកម្មការអន្តររដ្ឋាភិបាលរុស្ស៊ី-ទួរគីស្តីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ច។ ពួកគេ ក៏បានផ្លាស់ប្តូរយោបល់លើប្រធានបទជាច្រើននៃបញ្ហាអន្តរជាតិ និងតំបន់»។