ប្រធានាធិបតីអ៊ីរ៉ង់ លោក Masoud Pezeshkian បានរងការរិះគន់ នៅថ្ងៃអង្គារ (ទី៨ ខែកក្កដា) នេះ បន្ទាប់ពីបានបង្ហាញការគាំទ្រឲ្យមានកិច្ចចរចាថ្មីជាមួយសហរដ្ឋអាមេរិក ដោយអ្នករិះគន់បានចោទលោកថា «មានជំហរទន់ពេក» ក្រោយមានការវាយប្រហារកាលពីខែមុនលើប្រទេសនេះ។

ប្រតិកម្មតរិះគន់នេះបានកើតឡើងបន្ទាប់ពីមានការចេញផ្សាយនូវបទសម្ភាសន៍ ជាមួយពិធីករប្រព័ន្ធផ្សព្វផ្សាយអាមេរិក Tucker Carlson ដែលនៅពេលនោះលោក Pezeshkian បាននិយាយថា អ៊ីរ៉ង់ «គ្មានបញ្ហា» អ្វីឡើយ ក្នុងការចាប់ផ្ដើមឡើងវិញនូវកិច្ចពិភាក្សា ដរាបណាការជឿទុកចិត្តអាចត្រូវបានស្ដារឡើងវិញ រវាងភាគីទាំង២។

សម្ដីរបស់លោកបានកើតឡើងតិចជាងមួយខែ បន្ទាប់ពីអ៊ីស្រាអែលបានចាប់ផ្តើមយុទ្ធនាការទម្លាក់គ្រាប់បែកមិនធ្លាប់មានពីមុនមក កាលពីថ្ងៃទី១៣ ខែមិថុនា ជាការវាយប្រហារដែលបានសម្លាប់មេបញ្ជាការយោធាជាន់ខ្ពស់ និងអ្នកវិទ្យាសាស្ត្រនុយក្លេអ៊ែរជាច្រើនរូប នៅក្នុងប្រទេសអ៊ីរ៉ង់។

អ្វីដែលសំខាន់នោះ គឺថា ការវាយប្រហាររបស់អ៊ីស្រាអែលនោះបានកើតឡើង ២ថ្ងៃមុនកិច្ចប្រជុំដែលត្រូវបានគ្រោងទុក រវាងទីក្រុងតេអេរ៉ង់ និងវ៉ាស៊ីនតោន ជាជំនួបដែលមានបំណងធ្វើឲ្យការចរចានុយក្លេអ៊ែរដំណើរការឡើងវិញ។ កិច្ចពិភាក្សានោះបានជាប់គាំងតាំងពីពេលនោះមក។

អត្ថបទវិចារណកថាមួយ នៅលើទំព័រសារព័ត៌មានមាននិន្នាការរឹងរូស Kayhan ដែលបានប្រឆាំងនឹងការចូលរួមជាមួយលោកខាងលិចជាយូរមកហើយនោះ បានរៀបរាប់ថា៖ «តើអ្នកភ្លេចហើយមែនទេថា ជនជាតិអាមេរិកដូចគ្នាទាំងអស់នេះ រួមជាមួយនឹងពួកគាំទ្រលទ្ធិហ្សាអីន (អ៊ីស្រាអែល) បានប្រើប្រាស់ការចរចា ដើម្បីពន្យារពេលវេលា ហើយរៀបចំការវាយប្រហារ?»។

សហរដ្ឋអាមេរិកដែលបានបើកកិច្ចពិភាក្សាជាមួយអ៊ីរ៉ង់ តាំងពីថ្ងៃទី១២ ខែមេសា បានចូលរួមជាមួយអ៊ីស្រាអែល ដោយធ្វើការវាយប្រហារផ្ទាល់ខ្លួន កាលពីថ្ងៃទី២២ ខែមិថុនា ដោយផ្តោតលើទីតាំងនុយក្លេអ៊ែរអ៊ីរ៉ង់នៅទីក្រុង Fordo, Isfahan និង Natanz។

សារព័ត៌មានអភិរក្សនិយមចេញផ្សាយប្រចាំថ្ងៃ Javan ក៏បានផ្តោតលើលោក Pezeshkian ផងដែរ ដោយលើកឡើងថា សុន្ទរកថារបស់លោក ហាក់ដូចជាបង្ហាញពីការមាន «ជំហរទន់ពេក»៕