វិមានក្រឹមឡាំង នៅថ្ងៃអង្គារ (ទី៨ ខែកក្កដា) នេះ បានឲ្យដឹងថា ខ្លួនមានការភ្ញាក់ផ្អើលយ៉ាងខ្លាំង ចំពោះការស្លាប់ភ្លាមៗរបស់អតីតរដ្ឋមន្ត្រីដឹកជញ្ជូនរបស់រុស្ស៊ី គឺលោក Roman Starovoit ដែលដំណឹងនេះបានលេចឡើងប៉ុន្មានម៉ោងបន្ទាប់ពីប្រធានាធិបតី លោក Vladimir Putin បានបណ្តេញមន្ត្រីរូបនេះចេញពីតំណែង។

ក្រុមអ្នកស៊ើបអង្កេតរដ្ឋ បានឲ្យដឹងកាលពីថ្ងៃទី៧ ខែកក្កដាថា លោក Starovoit ត្រូវបានគេប្រទះឃើញស្លាប់ក្នុងរថយន្តរបស់លោក នៅខាងក្រៅទីក្រុងមូស្គូ ដោយមានរបួសដោយគ្រាប់កាំភ្លើង ហើយការសន្និដ្ឋានជាចម្បង គឺថា លោកបានធ្វើអត្តឃាត។

នៅពេលត្រូវបានសួរអំពីការស្លាប់របស់លោក Starovoit អ្នកនាំពាក្យវិមានក្រឹមឡាំង លោក Dmitry Peskov បាននិយាយថា លោក Putin បានទទួលព័ត៌មាន អំពីហេតុការណ៍នេះ ហើយបានពណ៌នាថា ជា «សោកនាដកម្ម និងរឿងគួរឲ្យសោកសៅ»។

យ៉ាងណាក្ដី លោក Peskov បានបដិសេធមិនធ្វើការប៉ាន់ស្មាន ជុំវិញមូលហេតុនៃការស្លាប់របស់លោក Starovoit នេះឡើយ ដោយលើកឡើងពីការស៊ើបអង្កេតដែលកំពុងបន្តមាន។

គួរបញ្ជាក់ថា ក្រឹត្យរបស់ប្រធានាធិបតីដែលបានចេញកាលពីថ្ងៃទី៧ ខែកក្កដា មិនបានផ្តល់ហេតុផលច្បាស់លាស់ សម្រាប់ការបណ្តេញលោក Starovoit ចេញពីតំណែងឡើយ បន្ទាប់ពីបានបំពេញតួនាទីបានត្រឹម ១ឆ្នាំប៉ុណ្ណោះ តែអ្នកវិភាគនយោបាយបានសង្ស័យថា វាមានទំនាក់ទំនងជាមួយការស៊ើបអង្កេត អំពើពុករលួយ នៅក្នុងតំបន់ Kursk ដែលលោកធ្លាប់គ្រប់គ្រង៕