យោងតាមការអះអាងរបស់ទីភ្នាក់ងារជនភៀសខ្លួនអង្គការសហប្រជាជាតិ(UNHCR) បានឲ្យដឹងថា ពលរដ្ឋអាហ្វហ្គានីស្ថានជិត ៤៥ម៉ឺននាក់ បានវិលត្រឡប់មកពីប្រទេសអ៊ីរ៉ង់វិញ ចាប់តាំងពីដើមខែមិថុនារហូតមក ក្រោយទីក្រុងតេអេរ៉ង់ដាក់ឱសានវាទថ្ងៃទី ៦ ខែកក្កដា សម្រាប់ឲ្យជនអន្តោប្រវេសន៍ និងជនភៀសខ្លួនគ្មានឯកសារ ចាកចេញពីប្រទេសរបស់ពួកគេ ។

ការវិលត្រឡប់មកវិញ បន្ថែមបន្ទុកលើបញ្ហាលំបាកមានស្រាប់របស់អាហ្វហ្គានីស្ថាន ស្របពេលដែលប្រទេសក្រីក្រមួយនេះ ពិបាករួចទៅហើយចំពោះរលកនៃពលរដ្ឋអាហ្វហ្គានីស្ថាន វិលត្រឡប់ពីប្រទេសប៉ាគីស្ថាន ចាប់តាំងពីឆ្នាំ ២០២៣រហូតមក ស្របពេលកើតមានវិបត្តិមនុស្សធម៌មួយក្នុងចំណោមវបត្តិមនុស្សធម៌ដ៏អាក្រក់បំផុតរបស់ពិភពលោក ក្រោយជម្លោះច្រើនទសវត្សរ៍ ។

ទីភ្នាក់ងារ UNHCR រាយការណ៍ថា ពលរដ្ឋ ១,៤លាននាក់ បានវិលត្រឡប់មកវិញ ឬត្រូវបានបង្ខំឲ្យវិលត្រឡប់មកកាន់ប្រទេសអាហ្វហ្គានីស្ថានវិញក្នុងឆ្នាំ ២០២៥នេះ ។ 

យោងតាមការអះអាងរបស់អ្នកនាំពាក្យអង្គការអន្តោប្រវេសន៍អន្តរជាតិ បានឲ្យដឹងថា ការឆ្លងកាត់ព្រំដែន បានកើនឡើងខ្លាំង ចាប់តាំងពីពាក់កណ្តាលខែមិថុនាមក ពេលដែលគេមើលឃើញពលរដ្ឋប្រហែល ៤ម៉ឺននាក់ វិលត្រឡប់មកកាន់ប្រទេសអាហ្វហ្គានីស្ថានវិញ ក្នុងរយៈពេលប៉ុន្មានថ្ងៃប៉ុណ្ណោះ ៕