នគរបាល នៅថ្ងៃអង្គារ (ទី៨ ខែកក្កដា) នេះ បានប្រាប់ឲ្យដឹងថា អ្នកភូមិឥណ្ឌា បានវាយដំគ្រួសារមួយដែលមានសមាជិក ៥នាក់រហូតដល់បាត់បង់ជីវិត ហើយយកសាកសពរបស់ពួកគេទៅបោះចោលក្នុងស្រះទឹកមួយ ដោយចោទប្រកាន់ពួកគេថា ចេះអំពើ «អាបធ្មប់» បន្ទាប់ពីមានការស្លាប់របស់ក្មេងប្រុសម្នាក់។

នគរបាល នៅរដ្ឋ Bihar ភាគខាងជើង បានឲ្យដឹងនៅក្នុងសេចក្តីថ្លែងការណ៍មួយថា មនុស្ស ៣នាក់ត្រូវបានចាប់ខ្លួន ហើយបានសារភាពថា បានប្រព្រឹត្តឧក្រិដ្ឋកម្មនេះ។ ស្ត្រី ៣នាក់ ក្នុងនោះរួមមានទាំងលោកយាយវ័យ ៧៥ឆ្នាំម្នាក់ផងដែរ ស្ថិតក្នុងចំណោមអ្នកដែលត្រូវបានវាយរហូតដល់ស្លាប់នេះ។

សេចក្តីថ្លែងការណ៍បានបញ្ជាក់ថា ជនជាប់ចោទសំខាន់ជាងគេ ជឿថា ការស្លាប់របស់កូនប្រុសគាត់នាពេលថ្មីៗនេះ គឺដោយសារជនរងគ្រោះម្នាក់ ក្នុងចំណោមនោះ ហើយបានចោទប្រកាន់ «អ្នកស្លាប់ និងក្រុមគ្រួសាររបស់គាត់ថា ចេះធ្វើអំពើអាបធ្មប់»។ នគរបាលបាននិយាយថា៖ «បន្ទាប់ពីវាយជនរងគ្រោះដល់ស្លាប់ ជនដៃដល់បានយកសាកសពដាក់លើត្រាក់ទ័រ ហើយយកទៅបោះចោលក្នុងស្រះទឹកមួយ»។

ឃាតក និងជនរងគ្រោះ គឺសុទ្ធតែជនជាតិនៃក្រុមកុលសម្ព័ន្ធ Oraon របស់ប្រទេសឥណ្ឌា នៅក្នុងរដ្ឋ Bihar ដែលជារដ្ឋក្រីក្របំផុតរបស់ឥណ្ឌា និងមានប្រជាជនយ៉ាងហោចណាស់ ១៣០លាននាក់ដែលភាគច្រើនកាន់សាសនាហិណ្ឌូ។

គួរដឹងថា ទោះបីជាមានយុទ្ធនាការប្រឆាំងនឹងអបិយជំនឿក៏ដោយ ក៏ការជឿលើអំពើអាបធ្មប់ នៅតែរីករាលដាលនៅតាមតំបន់ជនបទទូទាំងប្រទេសឥណ្ឌា ជាពិសេសនៅក្នុងសហគមន៍កុលសម្ព័ន្ធដាច់ស្រយាល៕