ស្របពេលដែលតំបន់ភាគឦសានប្រទេសស៊ីរី ជួបគ្រោះរាំងស្ងួតដ៏អាក្រក់នោះ ប្រជាពលរដ្ឋរស់នៅតាមទីក្រុងជាច្រើនដូចជាទីក្រុង Qamishli កំពុងងាកទៅរកការខួងអណ្តូងទឹកគ្មានច្បាប់ទម្លាប់ ដើម្បីទទួលបានទឹក ស្របពេលដែលកម្រិតទឹកក្រោមដីកាន់តែខ្សត់ខ្សោយនោះ ។

លោក Qahraman Barakat គឺជាពលរដ្ឋមួយរូបរស់នៅក្នុងទីក្រុង Qamishli និយាយថា វិបត្តិកាន់តែធ្ងន់ធ្ងរ បានបង្ខំសហគមន៍ខួងអណ្តូងទឹកកាន់តែជ្រៅជាងពេលមុន ។

គ្រោះរាំងស្ងួតដែលក្រសួងកសិកម្មនិយាយថា អាក្រក់បំផុតចាប់តាំងពីឆ្នាំ ១៩៥៨នោះ បង្កផលប៉ះពាល់យ៉ាងខ្លាំងដល់ប្រទេសស៊ីរីដែលញាំញីរួចទៅហើយដោយសារសង្រ្គាមស៊ីវិលរយៈពេល ១៣ឆ្នាំ ភាពឯកោការទូត និងទណ្ឌកម្មលោកខាងលិច ។

គ្រោះរាំងស្ងួត បានយាយីប្រទេសស៊ីរីអស់រយៈពេលច្រើនទសវត្សរ៍មកហើយ ប៉ុន្តែមិនអាក្រក់ដូចជាឆ្នាំនេះនោះទេ ។ 

ក្រសួងបន្តថា ការបម្រុងទឹកបានធ្លាក់ចុះជាង ៦០ភាគរយ បើធៀបនឹងកាលពីឆ្នាំមុនៗ ហើយកម្រិតទឹកទំនប់កាលពីខែមីនា បានធ្លាក់ទាបជាងកាលពីរយៈពេល ២ឆ្នាំមុន ។ តំបន់ខ្លះទៀតបាត់បង់ការបម្រុងទឹកក្រោមដីរហូតដល់ ៧០ភាគរយ ។

លោក Kadhem Hassan គឺជាកម្មករប្រតិបត្តិការម៉ាស៊ីនខួងអណ្តូងទឹកនៅទីក្រុង Qamishli និយាយថា នៅឆ្នាំនេះមាននូវតម្រូវការច្រើនសម្រាប់អណ្តូងទឹក ។ កាលពីមុន ពួកគេផ្គត់ផ្គង់ទឹករដ្ឋដល់ផ្ទះប្រជាពលរដ្ឋ ប៉ុន្តែបច្ចុប្បន្នការផ្គត់ផ្គង់ទឹកខ្សត់ខ្សោយជាងមុនច្រើន ។ លោកបន្តថា ថ្លៃខួងមានចម្លោះពី ៨ដល្លារ ទៅ ១០ដុល្លារ ក្នុង ១ម៉ែត្រក្រឡា ៕