អាកាសយានដ្ឋាន Bergamo របស់ប្រទេសអ៊ីតាលី ដែលមានក្រុមហ៊ុនអាកាសចរណ៍ផ្ដល់សេវាតម្លៃទាបទៅ និងមកទីក្រុងនៅក្បែរនោះ គឺ Milan ត្រូវបានបិទជាបណ្តោះអាសន្ន នាថ្ងៃអង្គារ (ទី៨ ខែកក្កដា) នេះ បន្ទាប់ពីបុរសម្នាក់បានស្លាប់នៅលើផ្លូវរត់ ក្នុងអំឡុងពេលមានការរៀបចំការហោះហើរ សម្រាប់យន្តហោះមួយគ្រឿង។

អាកាសយានដ្ឋានបានឲ្យដឹងនៅក្នុងសេចក្តីថ្លែងការណ៍មួយថា ប្រតិបត្តិការហោះហើរជាច្រើន ត្រូវបានផ្អាកពីម៉ោង ១០:២០ ដល់ម៉ោង ១២ ម៉ោងក្នុងស្រុក (ត្រូវនឹងម៉ោង ៨:២០នាទី ដល់ម៉ោង ១០ ម៉ោងសកល) «ដោយសារតែបញ្ហាដែលបានកើតឡើងនៅលើផ្លូវរត់» ដោយបន្ថែមថា ឧប្បត្តិហេតុកំពុងត្រូវបានស៊ើបអង្កេតដោយអាជ្ញាធរ។

អ្នកនាំពាក្យបានបញ្ជាក់ថា បុរសម្នាក់បានបាត់បង់ជីវិត ដោយបន្ថែមថា ជនរងគ្រោះមិនមែនជាអ្នកដំណើរ ឬជាសមាជិកបុគ្គលិកព្រលានយន្តហោះនោះទេ។ យោងតាមទីភ្នាក់ងារសារព័ត៌មាន ANSA បានឲ្យដឹងថា បុរសនេះត្រូវបានស្រូបចូលរហូតដល់ស្លាប់ដោយម៉ាស៊ីននៃយន្តហោះ Volotea ដែលត្រៀមនឹងចេញដំណើរ។

ការិយាល័យសារព័ត៌មានអ៊ីតាលី សម្រាប់ក្រុមហ៊ុនដឹកជញ្ជូនតម្លៃទាបរបស់អេស្ប៉ាញ មិនអាចទាក់ទងបានភ្លាមៗនោះឡើយ ដើម្បីសុំការអត្ថាធិប្បាយ។ ហើយនគរបាលទីក្រុង Bergamo ក៏មិនមានការអត្ថាធិប្បាយអ្វីភ្លាមៗដែរ៕