ពលរដ្ឋហ្កាហ្សា បានច្រានចោលផែនការរបស់លោកDonald Trump ដែលថានឹងតម្រូវឲ្យពួកគេចាកចេញពីតំបន់ហ្កាហ្សាកំពុងរងការហែកហួរដោយសង្រ្គាមរវាងក្រុមហាម៉ាស និងអ៊ីស្រាអែល ចាប់តាំងពីខែតុលាឆ្នាំ២០២៣មក។ពលរដ្ឋប៉ាឡេស្ទីន ម្នាក់ឈ្មោះ Mansour Abu Al-Khaier វ័យ៤៥ឆ្នាំ បានរៀបរាប់ថា ពួកគេនឹងមិនចាកចេញឡើយ ទោះបីមើលឃើញការស្លាប់រង្គាល និងការបំផ្លិចបំផ្លាញនៅក្នុងដែនដីរងការឡោមព័ទ្ធនេះក៏ដោយ។

ពួកគេបាននិយាយថា ទោះបីអាយុជីវិតរបស់ពលរដ្ឋប៉ាឡេស្ទីន ត្រូវបានបាត់បង់អំឡុងការវាយប្រហារតាមអាកាស និងការទម្លាក់គ្រាប់បែកដ៏ខ្លាំងក្លាក៏ដោយ ក៏ពួកគេនឹងមិនចាកចេញពីទឹកដីរបស់ខ្លួនតាមផែនការរបស់អ៊ីស្រាអែល គាំទ្រដោយប្រធានាធិបតីអាមេរិក លោក Donald Trump ដែលថានឹងជម្លៀសចេញនូវប្រជាពលរដ្ឋហ្កាហ្សាប្រមាណ ២,៣លាននាក់នោះឡើយ។

ពួកគេបាននិយាយថា ដែនដីនេះគឺជាទឹកដីរបស់ពួកគេ ។បើចាកចេញ តើឲ្យពួកគេទៅណា?។ ហើយត្រូវទុកទឹកដីនេះឲ្យអ្នកណា?។

លោកTrump ដែលបានទទួលស្វាគមន៍នាយករដ្ឋមន្ត្រីអ៊ីស្រាអែល Benjamin Netanyahu នៅសេតវិមានកាលពីថ្ងៃចន្ទដើមសប្ដាហ៍នេះ បានបង្ហាញពីវឌ្ឍនភាពលើគំនិតផ្តួចផ្តើមពោពេញដោយជម្លោះក្នុងការផ្លាស់ប្តូរទីលំនៅប្រជាជនប៉ាឡេស្ទីនចេញពីតំបន់ឆ្នេរសមុទ្រឡោមព័ទ្ធដោយអ៊ីស្រាអែលមួយនេះ ដោយលើកឡើងពីកិច្ចសហប្រតិបត្តិការដ៏ល្អពីប្រទេសជុំវិញ។     

ថ្លែងទៅកាន់អ្នកសារព័ត៌មានពេលចាប់ផ្តើមអាហារពេលល្ងាចរវាងក្រុមមន្ត្រីអាមេរិក និងអ៊ីស្រាអែល លោក Netanyahu បាននិយាយថា សហរដ្ឋអាមេរិក និងអ៊ីស្រាអែលកំពុងធ្វើការជាមួយប្រទេសផ្សេងទៀត ដែលនឹងផ្តល់ឱ្យពលរដ្ឋប៉ាឡេស្ទីននូវអនាគតដ៏ល្អប្រសើរ ដែលបង្ហាញថាពលរដ្ឋហ្កាហ្សា នឹងអាចផ្លាស់ទីទៅកាន់ប្រទេសជិតខាងនានាបាន៕