បណ្ដាប្រទេសមានសេដ្ឋកិច្ចធំជាងគេនៅអាស៊ីអាគ្នេយ៍បានត្រៀមខ្លួនកាលពីថ្ងៃអង្គារសប្ដាហ៍នេះ ដើម្បីជំរុញការចរចាពាណិជ្ជកម្មជាមួយទីក្រុងវ៉ាស៊ីនតោនក្រោយរងការដំឡើងពន្ធដ៏ខ្ពស់ ទោះមានការផ្តល់ជូនដ៏ច្របូកច្របល់ចុងក្រោយក្នុងការជំរុញការនាំចូល និងកាត់បន្ថយការយកពន្ធលើទំនិញសហរដ្ឋអាមេរិកក៏ដោយ។  

បណ្ដាប្រទេសក្នុងតំបន់ ស្ថិតក្នុងចំណោមប្រទេសដែលរងផលប៉ះពាល់ខ្លាំងបំផុតដោយសារការដំឡើងពន្ធដ៏ច្រើនរបស់ប្រធានាធិបតី Donald Trump ខណៈពួកគេពឹងផ្អែកលើការនាំចេញ និងការផលិតដើម្បីជំរុញសេដ្ឋកិច្ចមានតម្លៃសរុបជាង ៣,៨ សែនកោដិដុល្លារ ដែលមួយចំនួនបានជួយដោយការប្តូរខ្សែសង្វាក់ផ្គត់ផ្គង់ពីប្រទេសចិន។       

អត្រាពន្ធមិនផ្លាស់ប្តូរ ៣២% សម្រាប់ប្រទេសឥណ្ឌូនេស៊ី និង ៣៦% សម្រាប់ប្រទេសថៃ ចាប់ពីថ្ងៃទី ១ខែសីហា បានកើតឡើង ទោះមានការខិតខំប្រឹងប្រែងយឺតយ៉ាវក្នុងការបង្កើនសំណើរ ដូចជាការសន្យាបង្កើនការទិញទំនិញរបស់សហរដ្ឋអាមេរិក និងលុបចោលការយកពន្ធលើការនាំចូលជាច្រើនរបស់សហរដ្ឋអាមេរិកក៏ដោយ។   

ព័ត៌មានលម្អិតអំពីវិសាលភាពនៃការដំឡើងពន្ធមិនច្បាស់ភ្លាមៗទេ។ ម៉ាឡេស៊ី ដែលជាប្រទេសនាំចេញដ៏សំខាន់នៃបន្ទះឈីប និងគ្រឿងអេឡិចត្រូនិក ប្រឈមការយកពន្ធ២៥% កើនឡើងពី២៤% ដែលត្រូវបានគំរាមកាលពីក្នុងខែមេសា មុនពេល លោកTrump ផ្អាករយៈពេល ៩០ ថ្ងៃ។

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira ដែលបានស្នើទៅមន្ត្រីអាមេរិកបន្ទាប់ពីដំណើរទស្សនកិច្ចទៅកាន់ទីក្រុងវ៉ាស៊ីនតោនកាលពីសប្តាហ៍មុន បាននិយាយថាលោកមានការភ្ញាក់ផ្អើលតិចតួចក្នុងអត្រាពន្ធ៣៦ % សម្រាប់ថៃ ប៉ុន្តែបានត្រៀមខ្លួនរួចជាស្រេចក្នុងការផ្តល់ជូនបន្ថែមទៀតដល់ទីផ្សារនាំចេញដ៏ធំបំផុតរបស់ខ្លួន។

ប្រទេសឥណ្ឌូណេស៊ី ដែលជាប្រទេសមានសេដ្ឋកិច្ចធំបំផុតនៅអាស៊ីអាគ្នេយ៍ បាននិយាយថា អ្នកចរចាជាន់ខ្ពស់របស់ខ្លួន លោក Airlangga Hartarto បានធ្វើដំណើរទៅកាន់ទីក្រុងវ៉ាស៊ីនតោនកាលពីថ្ងៃអង្គារពីកិច្ចប្រជុំកំពូលរបស់ប្រទេសប្រេស៊ីលនៃក្រុមប្រទេស BRICS ហើយនឹងជួបពិភាក្សាជាមួយមន្ត្រីសហរដ្ឋអាមេរិក៕