លោក Donald Trump និងលោក Benjamin Netanyahu បានជួបពិភាក្សាគ្នាជាលើកទីពីរក្នុងរយៈពេល២៤ម៉ោងកាលពីថ្ងៃអង្គារ ខណៈប្រធានាធិបតីសហរដ្ឋអាមេរិក បានបង្កើនសម្ពាធលើនាយករដ្ឋមន្ត្រីអ៊ីស្រាអែល ដើម្បីឈានដល់កិច្ចព្រមព្រៀងមួយបញ្ចប់ «សោកនាដកម្ម» នៃសង្រ្គាមនៅតំបន់ហ្កាហ្សា។

ការវិលត្រឡប់របស់លោក Netanyahu ទៅកាន់សេតវិមានសម្រាប់កិច្ចពិភាក្សាជាថ្មី បានធ្វើឡើងបន្ទាប់ពីអ្នកសម្របសម្រួលរបស់ប្រទេសកាតា បានព្រមានថា វានឹងត្រូវការពេលវេលាដើម្បីចុះហត្ថលេខាលើបទឈប់បាញ់ដ៏ស្មុគស្មាញ រវាងអ៊ីស្រាអែល និងក្រុមហាម៉ាស នៅឯកិច្ចពិភាក្សាក្នុងទីក្រុងដូហា។

បេសកជនពិសេសរបស់ លោកTrump លោកSteve Witkoff បាននិយាយថា លោកសង្ឃឹមថានឹងមានកិច្ចព្រមព្រៀងមួយក្នុងរយៈពេលប៉ុន្មានថ្ងៃខាងមុខនេះ។ លោក Witkoff និយាយថា «យើងសង្ឃឹមថានៅចុងសប្តាហ៍នេះយើងនឹងមានកិច្ចព្រមព្រៀងដែលនឹងនាំយើងឲ្យមានបទឈប់បាញ់រយៈពេល៦០ថ្ងៃ។ លោក Witkoff បាននិយាយបន្ថែមថា កិច្ចព្រមព្រៀងនេះ នឹងរួមបញ្ចូលទាំងការវិលត្រឡប់របស់ចំណាប់ខ្មាំងនៅរស់ចំនួន១០នាក់ដែលត្រូវបានឃុំខ្លួនដោយក្រុមសកម្មប្រយុទ្ធប៉ាឡេស្ទីនចាប់តាំងពីការវាយប្រហារកាលពីខែតុលាឆ្នាំ២០២៣ របស់ក្រុមហាម៉ាសលើអ៊ីស្រាអែល និងចំណាប់ខ្មាំងស្លាប់ចំនួន៩នាក់ ។ មេដឹកនាំអ៊ីស្រាអែល ដែលបានទទួលទានអាហារពេលល្ងាចជាមួយលោក Trump បានវិលត្រឡប់ទៅសេតវិមានវិញ សម្រាប់កិច្ចពិភាក្សាដែលត្រូវបានធ្វើឡើងដោយគ្មានការចូលរួមពីប្រព័ន្ធផ្សព្វផ្សាយណាមួយឡើយ។

លោក Trump បានរក្សាការគាំទ្រដ៏រឹងមាំរបស់សហរដ្ឋអាមេរិកសម្រាប់អ៊ីស្រាអែល ជាពិសេសជុំវិញសង្រ្គាមអ៊ីរ៉ង់ និងអ៊ីស្រាអែលកាលពីពេលថ្មីៗនេះ ប៉ុន្តែថែមទាំងបាននិងកំពុងបង្កើនសម្ពាធដើម្បីបញ្ចប់នូវអ្វីដែលលោកហៅថា «ឋាននរក» នៅតំបន់ហ្កាហ្សា។