ប្រព័ន្ធផ្សព្វផ្សាយអ៊ីស្រាអែលរាយការណ៍ថា រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយថា លោកណែនាំយោធាឱ្យរៀបចំផែនការផ្លាស់ទីប្រជាជនប៉ាឡេស្ទីនទាំងអស់នៅតំបន់ហ្កាហ្សា ទៅជំរំមួយនៅទីក្រុង Rafah ភាគខាងត្បូងនៃទឹកដីហ៊ុមព័ទ្ធនេះ។

លោក Katz ប្រាប់អ្នកកាសែតនៅថ្ងៃចន្ទសប្ដាហ៍នេះថា លោកចង់បង្កើត "ទីក្រុងមនុស្សធម៌" នៅ Rafah ដើម្បីដាក់ប្រជាជនប៉ាឡេស្ទីនក្រុមដំបូងប្រហែល ៦០០.០០០នាក់ ហើយនៅទីបំផុត ប្រជាជន ២,១លាននាក់ទាំងមូល នឹងទៅរស់នៅជំរំនោះ។

លោក Katz បាននិយាយថា គោលបំណងគឺដើម្បីនាំប្រជាជនហ្កាហ្សាទៅរស់នៅទីនោះបន្ទាប់ពីត្រួតពិនិត្យសន្តិសុខរួច ដើម្បីធានាថាពុំមានប្រតិបត្តិករហាម៉ាស ហើយថាអ្នកស្រុកនឹងអនុញ្ញាតឱ្យចាកចេញបាន។ ប្រមុខការពារជាតិរូបនេះបន្ថែមថា ប្រសិនបើលក្ខខណ្ឌអនុញ្ញាត នោះការកសាងឡើងវិញនឹងចាប់ផ្ដើមអំឡុងពេលបទឈប់បាញ់ ៦០ថ្ងៃ ដែលអ៊ីស្រាអែល និងក្រុមហាម៉ាស កំពុងព្យាយាមចរចា។

មេធាវីសិទ្ធិមនុស្សអ៊ីស្រាអែលម្នាក់បានថ្កោលទោសរឿងនេះថាស្ទើរតែដូចទៅនឹង "ផែនការប្រតិបត្តិការសម្រាប់ឧក្រិដ្ឋកម្មប្រឆាំងមនុស្សជាតិ"។ អង្គការសហប្រជាជាតិក៏ព្រមានពីមុនដែរថា ការនិរទេស ឬការផ្ទេរដោយបង្ខំនៃប្រជាជនស៊ីវិលក្នុងទឹកដីកាន់កាប់ ត្រូវបានហាមឃាត់យ៉ាងតឹងរ៉ឹងក្រោមច្បាប់មនុស្សធម៌អន្តរជាតិ និង "ស្មើនឹងការបោសសម្អាតជនជាតិភាគតិច"។

ក្រោយមកនៅថ្ងៃចន្ទដដែលនោះ ក្នុងអំឡុងកិច្ចប្រជុំមួយនៅសេតវិមាន នាយករដ្ឋមន្ត្រីអ៊ីស្រាអែល លោក Benjamin Netanyahu បានជំរុញគំនិតរបស់លោកប្រធានាធិបតីអាមេរិក Donald Trump ដែលថា សហរដ្ឋអាមេរិកចូលកាន់កាប់តំបន់ហ្កាហ្សា ក្រោយសង្គ្រាម និងតាំងលំនៅថ្មីជាអចិន្ត្រៃយ៍ដល់ប្រជាជនហ្កាហ្សាទាំងមូលនៅកន្លែងផ្សេង៕