នាយករដ្ឋមន្ត្រីដាណឺម៉ាក លោកស្រី Mette Frederiksen បានព្រមានកាលពីថ្ងៃអង្គារថា រុស្ស៊ីអាចបង្កការគំរាមកំហែងសន្តិសុខយ៉ាងពិតប្រាកដដល់សហភាពអឺរ៉ុប នៅចុងទសវត្សរ៍នេះ ហើយឧស្សាហកម្មការពារជាតិនៅអឺរ៉ុប និងអ៊ុយក្រែន ត្រូវតែបង្កើនការរៀបចំ ក្នុងរយៈពេល ៥ឆ្នាំ ។

នៅក្នុងសុន្ទរកថាទៅកាន់សភាអឺរ៉ុបដែលបង្ហាញពីការចាប់ផ្តើមអាណត្តិ ៦ខែរបស់ប្រទេសដាណឺម៉ាក ក្នុងនាមជាអ្នកកាន់តំណែងជាប្រធានសហភាពអឺរ៉ុប លោកស្រី Frederiksen បានសម្តែងការសោកស្តាយថា៖«ការកាត់បន្ថយការចំណាយលើវិស័យការពារជាតិរបស់យើង ក្នុងរយៈពេល ៣០ឆ្នាំកន្លងមក គឺជាកំហុសដ៏ធំមួយ»។

មន្ត្រីអឺរ៉ុប បានព្រមានថា លោកប្រធានាធិបតី វ្ល៉ាឌីមៀ ពូទីន អាចព្យាយាមសាកល្បងការធានាសន្តិសុខមាត្រា ៥ របស់អង្គការណាតូ ក្នុងពេលឆាប់ៗនេះ ដែលជាការសន្យាថា ការវាយប្រហារលើសម្ព័ន្ធមិត្តណាមួយ នឹងត្រូវបានឆ្លើយតបជាមួយនឹងការឆ្លើយតបរួមពីប្រទេសទាំង ៣២។ សម្ព័ន្ធមិត្តភាគច្រើន គឺជាប្រទេសសហភាពអឺរ៉ុប។

រុស្ស៊ីត្រូវបានចោទប្រកាន់ពីបទបំផ្លិចបំផ្លាញ ការវាយប្រហារតាមអ៊ីនធឺណិត និងយុទ្ធនាការព័ត៌មានក្លែងក្លាយ ដែលភាគច្រើនធ្វើឲ្យការគាំទ្ររបស់អឺរ៉ុបសម្រាប់អ៊ុយក្រែន ចុះខ្សោយ ហើយខណៈដែលអឺរ៉ុបមិនស្ថិតក្នុងសង្រ្គាម ប៉ុន្តែលោក Mark Rutte អគ្គលេខាធិការអង្គការណាតូ បាននិយាយថា មិនទាន់មានសន្តិភាពទេ។

លោកស្រី Frederiksen បានថ្លែងប្រាប់សមាជិកសភាសហភាពអឺរ៉ុប នៅទីក្រុង Strasbourg ប្រទេសបារាំងថា៖«ការពង្រឹងឧស្សាហកម្មការពារជាតិរបស់អឺរ៉ុប គឺជាអាទិភាពដ៏សំខាន់បំផុត ហើយយើងត្រូវតែអាចការពារខ្លួននៅឆ្នាំ ២០៣០។ យើងមិនគួរអនុញ្ញាតឲ្យអឺរ៉ុបត្រូវបានដាក់ឲ្យនៅក្នុងទីតាំងមួយ ដែលយើងមិនអាចការពារខ្លួនយើង បានទៀតនោះទេ ពោលគឺយើងត្រូវការពារខ្លួនយើងឲ្យបានជាដាច់ខាត»។