លោកប្រធានាធិបតីអាមេរិក Donald Trump បានបញ្ជាក់ច្បាស់ៗកាលពីថ្ងៃអង្គារ (០៨ កក្កដា) ថានឹងពុំមាន "ការពន្យាពេល" បន្ថែមទៀតនៅក្នុងថ្ងៃផុតកំណត់យកពន្ធថ្មីទី០១ ខែសីហា ខាងមុខនោះទេ ដែលលោកបានកំណត់កាលពីថ្ងៃចន្ទសប្ដាហ៍នេះសម្រាប់ដៃគូពាណិជ្ជកម្មនានារបស់សហរដ្ឋអាមេរិក ដើម្បីចរចាកិច្ចព្រមព្រៀងថ្មី បើពុំនោះទេពួកគេត្រូវប្រឈមមុខនឹងពន្ធខ្ពស់ខ្លាំងលើទំនិញដែលនាំចូលទៅកាន់សហរដ្ឋអាមេរិក។

នៅក្នុងសារបង្ហោះលើបណ្ដាញសង្គម Truth Social លោក Trump បានសរសេរថា៖ "តាមលិខិតជូនដំណឹងអត្រាពន្ធ ដែលបានផ្ញើរួចហើយទៅកាន់ប្រទេសផ្សេងៗ និងលិខិតដែលនឹងត្រូវផ្ញើជាបន្តបន្ទាប់ទៀត បានបញ្ជាក់ថា ពន្ធគយនឹងចាប់ផ្តើមបង់នៅថ្ងៃទី០១ ខែសីហា ឆ្នាំ២០២៥។ ពុំមានការផ្លាស់ប្តូរដល់កាលបរិច្ឆេទនេះទេ ម្យ៉ាងវិញទៀត ប្រាក់ទាំងអស់នឹងដល់កំណត់ ហើយនិងត្រូវបង់ចាប់ពីថ្ងៃទី០១ ខែសីហា ឆ្នាំ២០២៥ តទៅ ដោយពុំមានការបន្ថែមណាមួយនឹងត្រូវបានផ្តល់ឱ្យនោះឡើយ"។

ទីផ្សារភាគហ៊ុនដែលខិតជិតមាត់ជ្រោះរួចទៅហើយ បន្ទាប់ពីលោក Trump បានចាប់ផ្តើមផ្ញើលិខិតព្រមានកាលពីថ្ងៃចន្ទ ពេលនេះបានបន្តធ្លាក់ចុះយ៉ាងគំហុកបន្ថែមទៀតក្រោយការបង្ហោះថ្មីនេះ។

គួរឱ្យដឹងថា ការផ្អាកពន្ធបដិការរបស់លោក Trump ដើមឡើយត្រូវដល់កំណត់ថ្ងៃ០៩ កក្កដា ប៉ុន្តែលោកបានផ្អាកប្រកាសកាលបរិច្ឆេទកំណត់ថ្មី ០១ សីហានោះ ខណៈពេលកំពុងបញ្ជូនលិខិតរាប់សិបច្បាប់ព្រមានប្រទេសនានាថា ទំនិញរបស់ពួកគេនឹងត្រូវទទួលរងពន្ធបដិការជិតដល់អត្រា ដែលលោកធ្លាប់បានប្រកាសនៅ “ថ្ងៃរំដោះ” ដ៏តក់ស្លុតរបស់លោកក្នុងខែមេសា៕