ក្រុមអ្នកជួយសង្គ្រោះរាប់សិបនាក់ បានស្វែងរកតាមច្រាំងទន្លេតំបន់ភ្នំនៅថ្ងៃពុធនេះ ដើម្បីស្វែងរកអ្នកបាត់ខ្លួន បន្ទាប់ពីទឹកជំនន់រដូវមូសុងបានហូរនាំស្ពានសំខាន់មួយរបស់ប្រទេសនេប៉ាល់ ដែលតភ្ជាប់ពីប្រទេសនេះទៅប្រទេសចិន បណ្តាលឱ្យមនុស្សយ៉ាងហោចណាស់៩នាក់ស្លាប់។

នគរបាល និយាយថា អ្នកជួយសង្គ្រោះរាប់សិបនាក់ បានទៅដល់តំបន់នោះរួចហើយ ហើយត្រូវបានគេរំពឹងថានឹងចូលរួមក្នុងកិច្ចខិតខំប្រឹងប្រែងជួយសង្គ្រោះ។ សាកសពមនុស្ស៩នាក់ ត្រូវបានរកឃើញពីទន្លេ។ យោងតាមការិយាល័យរដ្ឋបាលស្រុក Rasuwa បានឱ្យដឹងថា កងកម្លាំងសន្តិសុខ បានជួយសង្គ្រោះមនុស្ស៥៥នាក់ ក្នុងនោះមានជនជាតិឥណ្ឌា៤នាក់ និងជនជាតិចិនម្នាក់។

នាយករដ្ឋមន្ត្រី លោក Khadga Prasad Oli រួមជាមួយរដ្ឋមន្ត្រី និងមន្ត្រីជាន់ខ្ពស់ច្រើនរូប បានធ្វើដំណើរ ទៅកាន់តំបន់នោះ។ លោក Oli បានកោះប្រជុំបន្ទាន់មួយកាលពីយប់ថ្ងៃអង្គារ ហើយបានណែនាំដល់កងកម្លាំងសន្តិសុខ និងការិយាល័យរដ្ឋាភិបាលទាំងអស់ ជួយដល់កិច្ចខិតខំសង្គ្រោះ និងស្តារឡើងវិញ។

ទឹកជំនន់នៅទន្លេ Bhotekoshi កាលពីថ្ងៃអង្គារបានបំផ្លាញស្ពានមិត្តភាពមួយកន្លែង មានចម្ងាយ១២០គីឡូម៉ែត្រ ភាគខាងជើងរដ្ឋធានី Kathmandu។ លំនៅឋាននិងរថយន្តជាច្រើនគ្រឿងដែលចតនៅព្រំដែនដើម្បីឲ្យគយត្រួតពិនិត្យក៏ត្រូវបានទឹកហូនាំផងដែរ។ រថយន្តអគ្គិសនី រាប់រយគ្រឿងដែលនាំចូលពីប្រទេសចិន ត្រូវបានចតនៅចំណុចព្រំដែននោះ។

អាជ្ញាធរកាត់បន្ថយនិងគ្រប់គ្រងហានិភ័យគ្រោះមហន្តរាយជាតិ បាននិយាយថា អ្នកបាត់ខ្លួនទាំង ១៩ នាក់ មានពលរដ្ឋនេប៉ាល់ ១៣ នាក់ និងជនជាតិចិន ៦ នាក់ ។