ប្រធានាធិបតីសហរដ្ឋអាមេរិក លោក Donald Trump បានបង្កើនសង្គ្រាមពាណិជ្ជកម្មរបស់លោក ក្នុងសប្តាហ៍នេះ ដោយបានគំរាមកំហែងដំឡើងពន្ធខ្ពស់ខ្លាំងលើប្រទេសចំនួន១៤ ចាប់ពីថ្ងៃទី១ ខែសីហា ខណៈរដ្ឋបាលរបស់លោក មានបំណងបញ្ចប់ចុងក្រោយកិច្ចព្រមព្រៀងជាមួយប្រទេសដទៃទៀត។ លោក Trump បាននិយាយថា សហរដ្ឋអាមេរិកនឹងដាក់ការដំឡើងពន្ធ៣៥% លើទំនិញពីប្រទេសស៊ែរប៊ី។

នៅរោងចក្រ Albon Engineering ក្នុងប្រទេសស៊ែរប៊ី នាយកគ្រប់គ្រងទូទៅ លោក Ismet Grebovic បានបង្ហាញការព្រួយបារម្ភអំពីការដំឡើងពន្ធនេះ។ លោក Grebovic បាននិយាយថា «ជំហរនេះ បង្កឱ្យមានបញ្ហាប្រឈមនានាដ៏សំខាន់សម្រាប់អាជីវកម្មរបស់យើង ដោយសារ៦០% នៃផលិតកម្មទាំងមូលរបស់យើងនៅក្នុងប្រទេសស៊ែរប៊ី ត្រូវបាននាំចេញទៅកាន់ទីផ្សារសហរដ្ឋអាមេរិក»។

លោក បានសង្កត់ធ្ងន់លើសារៈសំខាន់នៃការស្វែងរកដំណោះស្រាយដែលមានប្រយោជន៍ទៅវិញទៅមក ដោយនិយាយថាក្រុមហ៊ុនផលិតរថយន្តធំៗរបស់សហរដ្ឋអាមេរិកដូចជា ក្រុមហ៊ុន Ford និងក្រុមហ៊ុន Navistar International ពឹងផ្អែកលើផលិតផលរបស់ពួកគេ។

មន្ត្រីនៅក្នុងសហភាពអឺរ៉ុបដែលមានសមាជិក២៧ ប្រទេស ដែលជាដៃគូពាណិជ្ជកម្មទ្វេភាគីធំបំផុតរបស់សហរដ្ឋអាមេរិក និយាយថា ពួកគេមានគោលបំណងសម្រាប់កិច្ចព្រមព្រៀងមួយមុនថ្ងៃទី១ ខែសីហា ដោយការចរចាបន្តផ្តោតលើការធ្វើឲ្យមាន «តុល្យភាពជាថ្មី» និងសម្បទានសម្រាប់ឧស្សាហកម្មនាំចេញសំខាន់ៗ។