សារព័ត៌មាន IRNA កាលពីថ្ងៃអង្គារ (ទី៨ ខែកក្កដា) បានរាយការណ៍ថា មជ្ឈមណ្ឌលសុវត្ថិភាពនុយក្លេអ៊ែររបស់អ៊ីរ៉ង់ បានឲ្យដឹងថា ការស៊ើបអង្កេតរកមិនឃើញភ័ស្តុតាងណាមួយ ដែលបង្ហាញថា អ៊ីស្រាអែលបានប្រើប្រាស់គ្រាប់បែកអ៊ុយរ៉ានីញ៉ូមកម្រិតទាបនោះឡើយ ក្នុងអំឡុងពេលមានជម្លោះរយៈពេល ១២ថ្ងៃថ្មីៗនេះ រវាងប្រទេសទាំង២។

ប្រព័ន្ធផ្សព្វផ្សាយរដ្ឋអ៊ីរ៉ង់ បានដកស្រង់សេចក្ដីថ្លែងការណ៍របស់មជ្ឈមណ្ឌលនេះ ដែលបានឲ្យដឹងថា៖ «យើងសូមជូនដំណឹងដល់ប្រជាជនអ៊ីរ៉ង់ជាទីគោរពគ្រប់រូបថា នៅក្នុងការសិក្សាដែលធ្វើឡើងរហូតមកដល់ពេលនេះ គ្មានសញ្ញានៃការប្រើប្រាស់សារធាតុអ៊ុយរ៉ានីញ៉ូមកម្រិតទាប ត្រូវបានរកឃើញនោះឡើយ»។

សេចក្តីប្រកាសនេះកើតឡើងបន្ទាប់ពីមានរបាយការណ៍របស់ទីភ្នាក់ងារសារព័ត៌មាន Fars កាលពីថ្ងៃទី២៦ ខែមិថុនា ដោយដកស្រង់ការអះអាងរបស់ប្រភព ដែលថា កងកម្លាំងអ៊ីស្រាអែលប្រហែលជាបានប្រើប្រាស់គ្រាប់បែកអ៊ុយរ៉ានីញ៉ូមកម្រិតទាបវាយប្រហារទីតាំងរបស់អ៊ីរ៉ង់ អំឡុងពេលមានជម្លោះ។

គួររំលឹកថា អ៊ីស្រាអែលបានបើកប្រតិបត្តិការយោធាប្រឆាំងនឹងអ៊ីរ៉ង់កាលពីថ្ងៃទី១៣ ខែមិថុនា ហើយសាធារណរដ្ឋឥស្លាម បានធ្វើការវាយប្រហារសងសឹកវិញ ក្នុងរយៈពេលមិនដល់ ២៤ម៉ោងក្រោយមក។ សហរដ្ឋអាមេរិក បានចូលរួមក្នុងជម្លោះនេះ ពោលគឺរយៈពេល ៩ថ្ងៃបន្ទាប់ពីភាពតានតឹងបានចាប់ផ្តើមឡើង ដោយកងកម្លាំងអាមេរិកបានវាយប្រហារទីតាំងនុយក្លេអ៊ែរអ៊ីរ៉ង់ចំនួន៣ កាលពីថ្ងៃទី២២ ខែមិថុនា។ ក្រោយមក ប្រធានាធិបតីអាមេរិក លោក Donald Trump បានប្រកាសថា អ៊ីស្រាអែល និងអ៊ីរ៉ង់ បានព្រមព្រៀងឈានដល់បទឈប់បាញ់ពេញលេញ ដែលចូលជាធរមាននៅថ្ងៃទី២៤ ខែមិថុនា។

មជ្ឈមណ្ឌលសុវត្ថិភាពនុយក្លេអ៊ែរអ៊ីរ៉ង់ បានធ្វើការវិភាគយ៉ាងទូលំទូលាយលើទីតាំងត្រូវបានវាយប្រហារទាំងនោះ ដើម្បីកំណត់ថា តើអាវុធអ៊ុយរ៉ានីញ៉ូមកម្រិតទាបត្រូវបានគេប្រើប្រាស់ដែរ ឬអត់។ អាវុធអ៊ុយរ៉ានីញ៉ូមកម្រិត ស្ថិតក្នុងភាពចម្រូងចម្រាសដោយសារតែសារធាតុវិទ្យុសកម្មរបស់វា និងលទ្ធភាពនៃផលប៉ះពាល់ដល់សុខភាព និងបរិស្ថានយូរអង្វែង។ 

ការរកឃើញនៃការស៊ើបអង្កេត គឺផ្ទុយនឹងការរំពឹងទុកពីមុន អំពីការប្រើប្រាស់អាវុធបែបនេះរបស់អ៊ីស្រាអែល ដែលប្រើប្រាស់ជាចម្បង សម្រាប់សមត្ថភាពទម្លុះជញ្ជាំង ដោយសារដង់ស៊ីតេ និងរឹងរបស់អ៊ុយរ៉ានីញ៉ូមកម្រិតទាប៕