សហរដ្ឋអាមេរិកមានឧបករណ៍ស្ទាក់ចាប់មីស៊ីល Patriot ត្រឹមតែ ២៥ភាគរយប៉ុណ្ណោះ ដែលខ្លួនត្រូវការសម្រាប់ផែនការយោធារបស់មន្ទីរបញ្ចកោណ បន្ទាប់ពីបានប្រើប្រាស់ពីឃ្លាំងស្តុកទុក នៅតំបន់មជ្ឈិមបូព៌ា ក្នុងប៉ុន្មានខែថ្មីៗនេះ ជាកង្វះខាតដ៏គួរឲ្យបារម្ភដែលនាំឲ្យរដ្ឋបាលរបស់លោក Donald Trump ប្រកាសផ្អាកបញ្ជូនអាវុធចុងក្រោយទៅអ៊ុយក្រែន។

ស្តុកប្រព័ន្ធការពារមីស៊ីល Patriot បានធ្លាក់ចុះទាប ដោយនាំឲ្យមានក្ដីបារម្ភ នៅក្នុងមន្ទីរបញ្ចកោណ ដែលវាអាចបង្កគ្រោះថ្នាក់ដល់ប្រតិបត្តិការយោធារបស់សហរដ្ឋអាមេរិក ហើយអនុរដ្ឋមន្ត្រីការពារជាតិ លោក Stephen Feinberg បានយល់ព្រមឲ្យផ្អាកការបញ្ជូននេះ ខណៈពេលដែលពួកគេពិនិត្យមើលពីកន្លែងដែលអាវុធត្រូវបានបញ្ជូន។

លោក Trump ហាក់ដូចជាបានត្រឡាស់ការសម្រេចនោះវិញ កាលពីថ្ងៃចន្ទ នៅពេលដែលលោកបានប្រាប់អ្នកសារព័ត៌មានមុនអាហារពេលល្ងាចនៅសេតវិមានជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu ថា លោកនឹង «បញ្ជូនអាវុធមួយចំនួនបន្ថែមទៀត» ទៅអ៊ុយក្រែន ទោះបីជាលោកមិនបានបង្ហាញនៅពេលនោះថា តើនឹងរួមបញ្ចូលប្រព័ន្ធ Patriot ដែរ ឬអត់ក៏ដោយ។

លោក Trump ក៏បានប្រាប់ប្រធានាធិបតីអ៊ុយក្រែន លោក Volodymyr Zelenskyy អំឡុងការជជែកតាមទូរសព្ទដែរថា លោកមិនទទួលខុសត្រូវ ចំពោះការបញ្ឈប់ការដឹកជញ្ជូនអាវុធនោះទេ ហើយថា លោកបានបញ្ជាឲ្យពិនិត្យឡើងវិញ ចំពោះឃ្លាំងអាវុធរបស់សហរដ្ឋអាមេរិក ប៉ុន្តែមិនបានបញ្ជាផ្អាកនោះឡើយ។ នេះបើយោងតាមបុគ្គលដែលបានផ្ដល់ព័ត៌មានពីការសន្ទនានោះ៕