សារព័ត៌មាន Anadolu បានរាយការណ៍ថា រដ្ឋមន្ត្រីការបរទេសទួរគី លោក Hakan Fidan បាននិយាយថា រុស្ស៊ីបានបង្ហាញពីការត្រៀមខ្លួន សម្រាប់ការចរចាជុំទី៣ ជាមួយប្រទេសអ៊ុយក្រែន។  

លោក Fidan បានថ្លែង បន្ទាប់ពីកិច្ចពិភាក្សាជាមួយរដ្ឋមន្ត្រីការបរទេសរុស្ស៊ី លោក Sergey Lavrov ថា៖ «រុស្ស៊ីបាននិយាយថា ពួកគេត្រៀមខ្លួន សម្រាប់ការចរចាជុំទី៣។ ឥឡូវនេះ យើងកំពុងរង់ចាំការឆ្លើយតបពីភាគីអ៊ុយក្រែន»។

ប្រមុខការទូតទួរគីរូបនេះ បានបន្ថែមថា ទីក្រុងមូស្គូចង់ឲ្យ «បញ្ហាជាច្រើនត្រូវបានដោះស្រាយ មុនពេលចាប់ផ្តើមការចរចា»។ តាមយោបល់លោក ក្រុមចរចានៅតែត្រូវធ្វើការ ដើម្បីសម្រេចបានលទ្ធផលជាក់ស្តែង។

គួររំលឹកថា ការចរចាជុំទី១ បានធ្វើឡើងកាលពីថ្ងៃទី ១៦ ខែឧសភា នៅទីក្រុងអ៊ីស្តង់ប៊ុល។ នៅពេលនោះ ភាគីទាំង២ បានព្រមព្រៀងគ្នាដោះដូរអ្នកទោសក្នុងទម្រង់ ១.០០០នាក់ទៅមក។

ហើយកាលពីថ្ងៃទី២ ខែមិថុនា ការចរចាសន្តិភាពជុំទី២ រវាងគណៈប្រតិភូអ៊ុយក្រែន និងរុស្ស៊ី បានបញ្ចប់នៅទីក្រុងអ៊ីស្តង់ប៊ុល។ ការចរចានោះ មានរយៈពេលប្រហែលមួយម៉ោង។ ប្រទេសទួរគី ដើរតួជាអ្នកសម្របសម្រួល។ 

ក្រោយមក លោក Fidan បាននិយាយថា ទួរគីរំពឹងថា ការចរចារថ្មី រវាងអ៊ុយក្រែន និងរុស្ស៊ី នឹងប្រព្រឹត្តទៅ ខណៈមានវឌ្ឍនភាពនៅក្នុងកិច្ចប្រជុំកាលពីថ្ងៃទី២ ខែមិថុនា នៅទីក្រុងអ៊ីស្តង់ប៊ុល៕