ប្រធានាធិបតីបារាំងដែលកំពុងបំពេញទស្សនកិច្ច លោក Emmanuel Macron កាលពីថ្ងៃអង្គារ បានគូសបញ្ជាក់ពីដំណោះស្រាយរដ្ឋពីរ ក្នុងការដោះស្រាយជម្លោះនៅតំបន់ហ្កាហ្សា ដោយបន្ថែមថា ការទទួលស្គាល់រដ្ឋប៉ាឡេស្ទីន គឺជា«ផ្លូវតែមួយគត់ ដើម្បីឈានដល់សន្តិភាព»។

នៅពេលថ្លែងសុន្ទរកថានៅសភាអង់គ្លេសក្នុងដំណើរបំពេញទស្សនកិច្ចផ្លូវរដ្ឋលើកដំបូងរបស់ខ្លួន លោក ម៉ាក្រុង បាននិយាយថា ដំណោះស្រាយរដ្ឋពីរ នឹងអនុញ្ញាតឲ្យអ៊ីស្រាអែលរស់នៅក្នុង «សន្តិភាព និងសន្តិសុខ ជាមួយប្រទេសជិតខាង»។ លោកបានអំពាវនាវឲ្យដោះលែងចំណាប់ថ្នូរទាំងអស់ និងបានជំរុញឲ្យ   ភាគីទាំងអស់ ធ្វើការរួមគ្នាលើមាគ៌ាឆ្បោះទៅសន្តិភាព នៅមជ្ឈិមបូព៌ា។

លោកបាននិយាយថា៖«សង្រ្គាមគ្មានទីបញ្ចប់» បង្ក «ការគំរាមកំហែងយ៉ាងធំ» ដល់តំបន់ ដោយបានសង្កត់ធ្ងន់ថា ចក្រភពអង់គ្លេស និងបារាំង ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ដែលប្តេជ្ញាចិត្តយ៉ាងជ្រាលជ្រៅចំពោះពហុភាគីនិយម «ត្រូវតែបង្ហាញពិភពលោកម្តងទៀតថា សម្ព័ន្ធភាពរបស់យើង អាចធ្វើឲ្យមានភាពខុសគ្នាទាំងស្រុង»។

ខណៈពេលដែលទាំងអង់គ្លេស និងបារាំង គាំទ្រដំណោះស្រាយរដ្ឋពីរ មិនទាន់មានកិច្ចព្រមព្រៀងស្តីពីពេលវេលាសម្រាប់ការទទួលស្គាល់រដ្ឋប៉ាឡេស្ទីន នៅឡើយទេ។