រដ្ឋមន្ត្រីការបរទេសអេហ្ស៊ីប លោក Badr Abdelatty និងតំណាងជាន់ខ្ពស់ទទួលបន្ទុកកិច្ចការបរទេស និងគោលនយោបាយសន្តិសុខរបស់សហភាពអឺរ៉ុប (EU) លោកស្រី Kaja Kallas បានពិភាក្សាគ្នាតាមទូរស័ព្ទអំពីការវិវឌ្ឍនៅមជ្ឈិមបូព៌ា ជាពិសេសនៅតំបន់ហ្កាហ្សាស្ទ្រីប និងអ៊ីរ៉ង់ កាលពីថ្ងៃអង្គារ។

យោងតាមសេចក្តីថ្លែងការណ៍របស់ក្រសួងការបរទេសអេហ្ស៊ីប លោក Abdelatty បានជំរាបជូនលោកស្រី Kallas អំពីវឌ្ឍនភាពចុងក្រោយបង្អស់ ក្នុងការចរចាបទឈប់បាញ់នៅហ្កាហ្សា និងកិច្ចខិតខំប្រឹងប្រែងដែលកំពុងបន្ត ដើម្បីធានាដល់ការដោះលែងចំណាប់ថ្នូរ និងអ្នកទោស។

លោកបានពិនិត្យមើលការសម្របសម្រួលរបស់ប្រទេសអេហ្ស៊ីបជាមួយកាតា និងសហរដ្ឋអាមេរិក ក្នុងការសម្រុះសម្រួលកិច្ចព្រមព្រៀងបទឈប់បាញ់ ដោយបានគូសបញ្ជាក់ពីតម្រូវការបន្ទាន់សម្រាប់សហគមន៍អន្តរជាតិ ក្នុងការបង្កើនកិច្ចខិតខំប្រឹងប្រែង ដើម្បីឈានដល់បទឈប់បាញ់យូរអង្វែង និងធានាដល់ការចូលដោយគ្មានឧបសគ្គនូវជំនួយមនុស្សធម៌ និងជំនួយ ទៅក្នុងតំបន់ហ្កាហ្សាស្ទ្រីប។

សម្រាប់ផ្នែករបស់លោកស្រី មន្ត្រីអឺរ៉ុបបានរំលឹកឡើងវិញនូវគោលជំហររបស់សហភាពអឺរ៉ុប លើការវិវឌ្ឍ នៅតំបន់ហ្កាហ្សា ដោយបញ្ជាក់ពីភាពធ្ងន់ធ្ងរនៃស្ថានភាពមនុស្សធម៌ នៅក្នុងតំបន់ហ្កាហ្សាស្ទ្រីប។

លោកស្រី Kallas បានសង្កត់ធ្ងន់លើភាពចាំបាច់នៃការបន្តយន្តការជំនួយមនុស្សធម៌របស់អង្គការសហប្រជាជាតិ ដើម្បីកាត់បន្ថយការឈឺចាប់របស់ប្រជាជនប៉ាឡេស្ទីន។ នេះបើយោងតាមសេចក្តីថ្លែងការណ៍។ 

ភាគីទាំងពីរ ក៏បានពិភាក្សាអំពីការវិវឌ្ឍថ្មីៗជុំវិញកិច្ចព្រមព្រៀងឈប់បាញ់រវាងអ៊ីស្រាអែល និងអ៊ីរ៉ង់។ លោក Abdelatty បានសង្កត់ធ្ងន់លើសារៈសំខាន់នៃការកែសម្រួលកិច្ចព្រមព្រៀង និងកាត់បន្ថយភាពតានតឹង នៅទូទាំងតំបន់។ លោកក៏បានគូសបញ្ជាក់ពីតម្រូវការ ដើម្បីបន្តការចរចាទាក់ទងនឹងកម្មវិធីនុយក្លេអ៊ែររបស់អ៊ីរ៉ង់។