ក្រុមចរចារបស់សហភាពអឺរ៉ុប (EU) កំពុងខិតជិតនឹងការមានកិច្ចព្រមព្រៀងពាណិជ្ជកម្មជាមួយលោក Donald Trump ដែលនឹងធ្វើឲ្យមានកម្រិតពន្ធខ្ពស់ជាងការផ្ដល់ឲ្យចក្រភពអង់គ្លេស ដោយនេះជាផលវិជ្ជមាននៃ Brexit (ការចាកចេញពី EU របស់ចក្រភពអង់គ្លេស) ដែលបានធ្វើឲ្យរង្គោះរង្គើដល់រដ្ឋធានីរបស់អឺរ៉ុបមួយចំនួន។

ទីក្រុងប្រ៊ុចសែលបានត្រៀមខ្លួនរួចជាស្រេច ដើម្បីចុះហត្ថលេខាលើកិច្ចព្រមព្រៀង «ក្របខ័ណ្ឌ» បណ្តោះអាសន្នដែលកំណត់អត្រាពន្ធ «បដិការ» របស់ប្រធានាធិបតីអាមេរិក ក្នុងកម្រិត ១០ភាគរយ ខណៈពេលដែលការពិភាក្សាបន្តប្រព្រឹត្តទៅ ដោយត្រូវគ្នានឹងកាតព្វកិច្ចពន្ធមូលដ្ឋានដែលដាក់លើចក្រភពអង់គ្លេស។

ប៉ុន្តែបើយោងតាមអ្នកការទូតចំនួន ៦រូបដែលត្រូវបានផ្ដល់ព័ត៌មាន អំពីបញ្ហានេះ បានឲ្យដឹងថា EU មិនរំពឹងថា នឹងទទួលបានលទ្ធភាពចូលទៅកាន់ទីផ្សារសហរដ្ឋអាមេរិក ដូចគ្នាទៅនឹងដែកថែប រថយន្ត និងផលិតផលផ្សេងទៀតរបស់អង់គ្លេសដែលជាប់កាតព្វកិច្ចពន្ធតាមវិស័យនោះឡើយ។ លោក Trump ដែលជាបានគាំទ្រការសម្រេចឆ្នាំ២០១៦ របស់ចក្រភពអង់គ្លេស ក្នុងការចាកចេញពីប្លុកនេះ ក៏កំពុងទាមទារផងដែរនូវអត្រាពន្ធ ១៧ភាគរយលើផលិតផលកសិកម្មរបស់ EU។

អ្នកការទូតម្នាក់ បានបង្ហើបថា៖ «កិច្ចព្រមព្រៀងរបស់ចក្រភពអង់គ្លេស គឺប្រសើរជាងនេះ។ វាគឺជារឿងគួរឲ្យភ្ញាក់ផ្អើល បើគិតពីរយៈពេលដ៏យូរអង្វែងដែលយើងបានធ្វើការចរចា»។

យ៉ាងណាក្ដី នៅពេលដែលអង់គ្លេស បានឈានដល់កិច្ចព្រមព្រៀងលើកដំបូង កាលពីខែឧសភា អ្នកការទូត និងមន្ត្រីរបស់ EU បានបញ្ជាក់យ៉ាងច្បាស់ថា ពួកគេជឿថា ទីក្រុងឡុងដ្រ៍បានឈានដល់កិច្ចព្រមព្រៀងយ៉ាងប្រញាប់ប្រញាល់ និងទទួលយកលក្ខខណ្ឌមិនអំណោយផល៕

កិច្ចពិភាក្សារវាង EU និងអាមេរិក កំពុងបន្តប្រព្រឹត្តទៅ ប៉ុន្តែភាគីទាំង២ រំពឹងថា នឹងឈានដល់កិច្ចព្រមព្រៀង ក្នុងសប្តាហ៍នេះ។ បើគ្មានកិច្ចព្រមព្រៀងទេ អត្រាពន្ធលើ EU នឹងកើនឡើងដល់ ២០ភាគរយ ឬ ៥០ភាគរយ នៅថ្ងៃទី១ ខែសីហា បន្ទាប់ពីលោក Trump បានពន្យារពេលកំណត់ថ្ងៃទី៩ ខែកក្កដា។ អ្នកការទូតម្នាក់ បានលើកឡើងថា ការកាត់បន្ថយកម្រិតមកត្រឹម ១០ភាគរយ គឺជាជោគជ័យហើយ៕