រុស្ស៊ីបានវាយប្រហារអ៊ុយក្រែនដោយយានដ្រូនក្នុងចំនួនជាកំណត់ត្រា ៧២៨គ្រឿង ពេញមួយយប់ នៅថ្ងៃពុធ (ទី៩ ខែកក្កដា) ពោលគឺភ្លាមៗបន្ទាប់ពីលោកប្រធានាធិបតីអាមេរិក Donald Trump បានសន្យាថា នឹងបញ្ជូនប្រព័ន្ធការពារបន្ថែមទៀតទៅកាន់ទីក្រុងគីវ និងបានរិះគន់ចំៗខុសពីធម្មតា ចំពោះប្រធានាធិបតីរុស្ស៊ីលោក Vladimir Putin។

កងទ័ពអាកាសអ៊ុយក្រែន បានឲ្យដឹងថា រុស្ស៊ីបានវាយប្រហារដោយយានដ្រូនចំនួន ៧២៨គ្រឿង និងមីស៊ីល ១៣គ្រាប់ ដោយបានបន្ថែមថា ប្រព័ន្ធការពារដែនអាកាសរបស់ខ្លួន បានស្ទាក់ចាប់យានដ្រូនចំនួន ៧១១គ្រឿង ខណៈយ៉ាងហោចណាស់មីស៊ីលចំនួន ៧គ្រាប់ត្រូវបានបំផ្លាញ។ ការវាយប្រហារចុងក្រោយនេះ បានបំបែកកំណត់ត្រាវាយប្រហារពីមុនរបស់រុស្ស៊ី ដែលមានប្រើប្រាស់យានដ្រូន និងមីស៊ីលបូកបញ្ចូលគ្នាចំនួន ៥៥០ កាលពីសប្តាហ៍មុន។

ប្រធានាធិបតីអ៊ុយក្រែន លោក Volodymyr Zelenskyy បានឲ្យដឹងនៅលើបណ្ដាញ Telegram ថា ការវាយប្រហារដែលកើតឡើងបន្ទាប់ពីមានការវាយប្រហារតាមអាកាសយ៉ាងខ្លាំងក្លាជាបន្តបន្ទាប់លើអ៊ុយក្រែន ក្នុងប៉ុន្មានសប្តាហ៍ថ្មីៗនេះ បានបង្ហាញពីតម្រូវការឲ្យមានការដាក់ទណ្ឌកម្ម «តឹងរ៉ឹងប្រកបដោយប្រសិទ្ធភាព» លើប្រភពចំណូលដែលរុស្ស៊ីប្រើប្រាស់ ដើម្បីផ្តល់ហិរញ្ញប្បទានដល់សង្រ្គាម ក្នុងនោះរួមទាំងលើអ្នកដែលទិញប្រេងពីរុស្ស៊ីផងដែរ។

លោក Trump បាននិយាយកាលពីថ្ងៃអង្គារថា លោកកំពុងពិចារណាគាំទ្រដល់សេចក្តីព្រាងច្បាប់ នៅព្រឹទ្ធសភា ដែលនឹងដាក់ទណ្ឌកម្មយ៉ាងធ្ងន់ធ្ងរលើរុស្ស៊ី ក្នុងនោះរួមទាំងអត្រាពន្ធ ៥០០ភាគរយលើប្រទេសដែលទិញប្រេង ឧស្ម័ន អ៊ុយរ៉ានីញ៉ូម និងការនាំចេញផ្សេងទៀតរបស់រុស្ស៊ី៕