ទីក្រុងប៉េកាំង នៅថ្ងៃពុធ (ទី៩ ខែកក្កដា) នេះ បានបញ្ជាក់ថា សហភាពអឺរ៉ុប (EU) ចាំបាច់ត្រូវធ្វើឲ្យមានតុល្យភាពឡើងវិញផ្នែក «ផ្នត់គំនិត» មិនមែនផ្នែកទំនាក់ទំនងសេដ្ឋកិច្ចរបស់ខ្លួនជាមួយប្រទេសចិននោះឡើយ ដោយការលើកឡើងនេះកើតមាននៅមុនកិច្ចប្រជុំកំពូល រវាងប្រទេសទាំង២ ក្នុងខែនេះ។

អ្នកនាំពាក្យក្រសួងការបរទេស លោកស្រី Mao Ning បាននិយាយថា៖ «ប្រទេសចិនសង្ឃឹមថា ភាគីអឺរ៉ុបទទួលស្គាល់ថា អ្វីដែលចាំបាច់ត្រូវធ្វើមានតុល្យភាពឡើងវិញ នៅពេលនេះ គឺផ្នត់គំនិតរបស់អឺរ៉ុប មិនមែនទំនាក់ទំនងសេដ្ឋកិច្ច និងពាណិជ្ជកម្មចិន-សហភាពអឺរ៉ុបនោះទេ»។

គួរបញ្ជាក់ថា ប្រធានគណៈកម្មការអឺរ៉ុប លោក Ursula von der Leyen បាននិយាយកាលពីថ្ងៃអង្គារថា EU នឹងព្យាយាមធ្វើឲ្យមានតុល្យភាពឡើងវិញនូវទំនាក់ទំនងសេដ្ឋកិច្ចជាមួយប្រទេសចិន ដោយទាមទារឲ្យទីក្រុងប៉េកាំងបន្ធូរបន្ថយឲ្យក្រុមហ៊ុនអឺរ៉ុបមានលទ្ធភាពចូលទៅកាន់ទីផ្សារ និងសម្រាលការរឹតបន្តឹងលើការនាំចេញរ៉ែកម្រ។

យ៉ាងណាក្ដី នៅថ្ងៃពុធនេះ ទីក្រុងប៉េកាំងបានតបតវិញខ្លាំងៗ ចំពោះការលើកឡើងនោះ ដោយប្រាប់ថា នៅក្នុង «ស្ថានភាពដ៏ច្របូកច្របល់នាពេលបច្ចុប្បន្ន» ប្លុកនេះ និងប្រទេសចិន គួរតែ «ដោះស្រាយឲ្យបានត្រឹមត្រូវនូវភាពខុសគ្នា និងភាពមិនចុះសម្រុងគ្នានានា»។

លោក Mao បានសង្កត់ធ្ងន់ថា៖ «យើងសង្ឃឹមថា EU ពិតជានឹងបង្កើតបានយ៉ាងពិតប្រាកដនូវការយល់ដឹងយ៉ាងត្រឹមត្រូវ និងសមហេតុសមផល ចំពោះប្រទេសចិន និងបន្តគោលនយោបាយវិជ្ជមាន និងជាក់ស្តែងបន្ថែមទៀត ចំពោះប្រទេសចិន»៕