ការវាយប្រហារយានដ្រូនអ៊ុយក្រែនលើតំបន់ឆ្នេរនៅទីក្រុង Kursk របស់រុស្ស៊ី បានសម្លាប់មនុស្ស ៣នាក់ និងមនុស្ស ៧នាក់ផ្សេងទៀត រងរបួស ។

លោក Alexander Khinshtein គឺជាអភិបាលតំបន់ Kursk ដែលជាប់ព្រំដែនជាមួយអ៊ុយក្រែន និយាយនៅលើបណ្តាញព័ត៌មានសង្គម Telegramថា ការវាយប្រហារនេះ ធ្វើឡើងដោយចេតនាលើតំបន់រស់នៅរបស់ប្រជាពលរដ្ឋ ។

ខណៈពេលនោះដែរ ក្រសួងការពារជាតិរុស្ស៊ីនិយាយដែរថា អង្គភាពការពារដែនអាកាសរបស់ពួកគេ បានបំផ្លាញយានដ្រូន ៨៦គ្រឿងលើតំបន់ Kursk ។

មនុស្ស ៥នាក់ ក្នុងចំណោមអ្នករងរបួស ៧នាក់នៅតំបន់ Kursk រួមទាំងកុមារអាយុ ៥ឆ្នាំ ស្ថិតក្នុងស្ថានភាពធ្ងន់ធ្ងរ និងកំពុងសម្រាកព្យាបាលនៅមន្ទីរពេទ្យ ។

លោក Khinshteinនិយាយថា មនុស្សម្នាក់ក្នុងចំណោមអ្នកស្លាប់ គឺជាសមាជិកឆ្មាំជាតិរុស្ស៊ីដែលព្យាយាមជម្លៀសមនុស្សចេញពីកន្លែងកើតហេតុ ។

លោកបន្តថា សមាជិកឆ្មាំជាតិម្នាក់នេះ បានមកដល់តំបន់ឆ្នេរជាមួយសមមិត្តរបស់គាត់ ក្រោយប្រជាពលរដ្ឋចាប់ផ្តើមរាយការណ៍ពីការវាយប្រហារយានដ្រូន ។ គាត់ចាប់ផ្តើមជម្លៀសមនុស្ស ពេលដែលការផ្ទុះលើកទី ២បានកើត បណ្តាលឲ្យគាត់បាត់បង់អាយុជីវិត ។

សូមបញ្ជាក់ថា រុស្ស៊ី និងអ៊ុយក្រែន ចោទប្រកាន់គ្នាទៅវិញទៅមកថា មានគោលដៅលើជនស៊ីវិល នៅក្នុងសង្រ្គាមដែលបានឈានដល់ឆ្នាំទី ៤នេះ ។ ភាគីជម្លោះទាំង ២ ច្រានចោលការចោទប្រកាន់ខាងលើ ប៉ុន្តែជនស៊ីវិលរាប់ម៉ឺននាក់ ត្រូវបានសម្លាប់ នៅក្នុងជម្លោះ ដែលភាគច្រើននៃពួកគេនៅក្នុងប្រទេសអ៊ុយក្រែន ៕