​បាល់ទាត់៖ ​ក្លិប​​ហង្ស​ក្រហម Liverpool ធ្វើ​លិខិត​ផ្លូវការ​មួយ​ស្នើ​ដើម្បី​លើក​ការប្រកួត​វគ្គ​ពាក់កណ្ដាល​ផ្ដាច់ព្រ័ត្រ Carabao Cup ជើង​ទី​១ នៅ​ទឹកដី Arsenal ដោយសារ​ការ​កើន​ឡើង​នៃ​ករណី​ឆ្លង Covid-19 នៅ​ក្នុង​ក្លិប​។ ​​Liverpool បាន​លុបចោល​ការហ្វឹកហាត់​ជុំគ្នា​របស់​ក្រុម​ធំ​នៅ​ថ្ងៃ​អង្គារ​ម្សិលមិញ ខណៈ​អ្នកចាត់ការ Jurgen Klopp ក៏​អវត្តមាន​ពី​ការប្រកួត​ដែរ​កាលពី​ថ្ងៃអាទិត្យ​នៅពេល Liverpool ស្មើ​នៅ​ទឹកដី Chelsea ក្រោយ​តេស្ត​វិជ្ជមាន Covid-19​។​

​ជាមួយគ្នា​នោះដែរ​កីឡាករ​សំខាន់ៗ​មួយចំនួនទៀត​ដូចជា​អ្នកចាំទី Alisson Becker, Joel Matip និង Roberto Firmino សុទ្ធតែ​អវត្តមាន​ពី​ការប្រកួត​នោះបូក​បញ្ចូល​ជាមួយ​បុគ្គលិក​ក្លិប​ ៣នាក់​ទៀត​ដែល​សុទ្ធតែ​ឆ្លង Covid-19​។​ ​មិន​ត្រឹមតែ​ប៉ុណ្ណោះ Liverpool ក៏​នឹង​បាត់បង់​កីឡាករ ​៣នាក់​សំខាន់ៗ​រួមមាន Mohamed Salah, Sadio Mane និង Naby Keita ដោយ​ពួកគេ​ត្រូវ​ទៅ​ចូលរួម​ការប្រកួត​ជើងឯក​ទ្វីប​អាហ្វ្រិក​។ ​​សំណើសុំ​លើក​ការប្រកួត​នេះ​ត្រូវ​បាន​បញ្ជូន​ទៅកាន់ EFL រួចរាល់​ ខណៈ​ការប្រកួត​គ្រោង​ធ្វើ​នៅ​យប់​ថ្ងៃ​ព្រហស្បតិ៍​នេះ​។ ​ក្រៅពី​ជួប Arsenal ស្អែក​នេះ Liverpool ក៏​ត្រូវ​ប្រកួត FA Cup នៅ​ថ្ងៃអាទិត្យ​ដែរ​ដោយ​ជួប​ជាមួយ Shrewsbury Town មុននឹង​ជួប Arsenal ម្តង​ទៀត​ជើង​ទី​២ វគ្គ​ពាក់កណ្តាល​ផ្តាច់ព្រ័ត្រ Carabao Cup នៅ​ថ្ងៃទី១៣៕

​អត្ថបទ​៖​នាង សុភា​វុ​ធ