នាយករដ្ឋមន្ត្រីអេស្ប៉ាញ លោក Pedro Sanchez នៅថ្ងៃពុធ (ទី៩ ខែកក្កដា) នេះ បានបង្ហាញផែនការ ដើម្បីលុបបំបាត់អំពើពុករលួយ ជាកិច្ចប្រឹងប្រែងដែលស្វែងរកការរក្សាការគាំទ្រ នៅសភា សម្រាប់រដ្ឋាភិបាលរបស់លោក បន្ទាប់ពីសមាជិកជាន់ខ្ពស់នៃគណបក្សកំពុងកាន់អំណាចរបស់លោក គឺបក្សសង្គមនិយម ត្រូវបានចោទប្រកាន់ពីបទកេងបន្លំ។

កាលពីខែមុន ចៅក្រមតុលាការកំពូល បានបញ្ជាឲ្យឃុំខ្លួនជាបណ្តោះអាសន្ន ចំពោះលោក Santos Cerdan ជាអតីតមន្ត្រីបក្សលំដាប់ទី៣ ជុំវិញការចោទប្រកាន់ ដែលថា លោកបានទទួល និងចែកចាយប្រាក់សគុណ ជាថ្នូរនឹងការផ្តល់កិច្ចសន្យាការងារសាធារណៈ។

លោក Cerdan បដិសេធការចោទប្រកាន់នេះ ដែលជាផ្នែកមួយនៃការស៊ើបអង្កេត ពាក់ព័ន្ធនឹងអំពើពុករលួយកាន់តែទូលំទូលាយ។ ក្រោយមានករណីនេះ ក្រុមប្រឆាំងអំពាវនាវឲ្យមានការបោះឆ្នោតមុនអាណត្តិ ដែលគំរាមកំហែងធ្វើឲ្យរដ្ឋាភិបាលរបស់លោក Sanchez មានអស្ថិរភាព។

លោក Sanchez ដែលជាអគ្គលេខាធិការនៃគណបក្សសង្គមនិយម បានប្រាប់សភាក្នុងសម័យប្រជុំវិសាមញ្ញ អំពីករណីដែលបាននាំឲ្យលោកពិចារណាភ្លាមៗ អំពីការលាលែង ប៉ុន្តែសម្រេចបន្តកាន់តំណែងទៀត ដោយលើកហេតុផលថា រូបលោកផ្ទាល់ មិនបានធ្វើអ្វីខុសឡើយ។ លោកបានបញ្ជាក់ថា៖ «ខ្ញុំជាអ្នកនយោបាយស្អាតស្អំ ដូច្នេះ ខ្ញុំមិនលាលែងទេ»។

ហើយជាមួយគ្នានេះ លោក Sanchez ដែលបានបដិសេធជាថ្មីម្តងទៀតនូវការអំពាវនាវឲ្យមានការបោះឆ្នោតមុនកាលកំណត់ បានប្រកាសវិធានការចំនួន ១៥ចំណុច ក្នុងនោះមានរួមទាំងការទប់ស្កាត់ក្រុមហ៊ុនដែលត្រូវបានរកឃើញថា មានកំហុសពីបទសូកប៉ាន់ កុំឲ្យទទួលបានកិច្ចសន្យាលទ្ធកម្មរបស់រដ្ឋាភិបាល និងធ្វើការជាមួយក្រុមប្រឆាំងអំពើពុករលួយរបស់អង្គការ សម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ ដើម្បីបង្ក្រាបការប្រព្រឹត្តិអំពើពុករលួយ៕