អ្នកនាំពាក្យរបស់មេដឹកនាំអ៊ុយក្រែន បានឲ្យដឹងថា ប្រធានាធិបតីអ៊ុយក្រែន លោក Volodymyr Zelenskiy គ្រោងនឹងជួបជាមួយបេសកជនរបស់ប្រធានាធិបតីអាមេរិក Donald Trump ប្រចាំនៅអ៊ុយក្រែន គឺលោក Keith Kellogg នៅទីក្រុងរ៉ូម ប្រទេសអ៊ីតាលី នាថ្ងៃពុធ (ទី៩ ខែកក្កដា) នេះ ដោយជំនួបនេះកើតមានភ្លាមៗបន្ទាប់ពីលោក Trump បានសន្យាបញ្ជូនប្រព័ន្ធការពារបន្ថែមទៀតទៅកាន់ទីក្រុងគីវ។

ឥស្សរជនទាំង២ កំពុងធ្វើដំណើរទៅកាន់ប្រទេសអ៊ីតាលី មុនសន្និសីទ នៅថ្ងៃទី ១០-១១ ខែកក្កដា ដែលផ្ដោតលើការស្ដារឡើងវិញ និងការកសាងឡើងវិញរយៈពេលវែងរបស់អ៊ុយក្រែន បន្ទាប់ពីមានការលុកលុយរបស់រុស្ស៊ី។

គួរបញ្ជាក់ថា ការប៉ុនប៉ងរបស់សហរដ្ឋអាមេរិក ដើម្បីបញ្ចប់សង្រ្គាមនៅអ៊ុយក្រែនតាមរយៈការទូត បានជាប់គាំង ហើយកាលពីថ្ងៃអង្គារ លោក Trump បានបង្ហាញពីការរិះគន់ចំៗខុសធម្មតា ចំពោះប្រធានាធិបតីរុស្ស៊ី លោក Vladimir Putin។

លោកបាននិយាយកាលពីថ្ងៃចន្ទថា លោកបានយល់ព្រមផ្គត់ផ្គង់អាវុធបន្ថែមដល់អ៊ុយក្រែន ដែលជាអាវុធការពារជាចម្បង ដើម្បីជួយឲ្យប្រទេសនេះការពារការរុលទៅមុខរបស់រុស្ស៊ី។

សន្និសីទទីក្រុងរ៉ូម ដែលជាព្រឹត្តិការណ៍លើកទី៤ ចាប់តាំងពីមានការលុកលុយរបស់រុស្ស៊ី នៅខែកុម្ភៈ ឆ្នាំ២០២២ លើប្រទេសជិតខាងរបស់ខ្លួន គឺមានគោលបំណងជាចម្បង ក្នុងការកៀរគរការគាំទ្រជាអន្តរជាតិ សម្រាប់ប្រទេសអ៊ុយក្រែន៕