ប្រភពពីមន្ត្រីអាមេរិកពីររូប បានប្រាប់សារព័ត៌មានរ៉យទ័រកាលពីថ្ងៃពុធ (០៩ កក្កដា) ថា សហរដ្ឋអាមេរិក កំពុងតែផ្តល់គ្រាប់ផ្លោងកាំភ្លើងធំ និងមីស៊ីលបំពាក់ប្រព័ន្ធចល័តទៅកាន់អ៊ុយក្រែន ប៉ុន្មានថ្ងៃប៉ុណ្ណោះបន្ទាប់ពីរដ្ឋបាលរបស់លោកប្រធានាធិបតីអាមេរិក Donald Trump បញ្ឈប់ការដឹកជញ្ជូនសព្វាវុធសំខាន់ៗមួយចំនួនទៅទីក្រុងគីវ។

ក្រុមមន្ត្រីទាំងនេះនិយាយថា ការផ្អាកដឹកជញ្ជូនអាវុធមួយចំនួនកាលពីសប្តាហ៍មុននោះ ហាក់ដូចជាផ្សារភ្ជាប់នឹងក្ដីបារម្ភថា ឃ្លាំងស្តុកអាវុធរបស់អាមេរិក អាចទាបខ្លាំងពេក។ ចាប់តាំងពីពេលផ្អាកនោះមក លោក Trump និយាយថាលោកមិនដឹងសោះឡើយថាអ្នកណាជាអ្នកបញ្ជាឱ្យផ្អាក ហើយថាលោកនឹងបញ្ជូនអាវុធបន្ថែមឱ្យអ៊ុយក្រែន ផ្ដោតលើប្រភេទការពារជាចម្បង ដើម្បីជួយប្រទេសហែកហួរដោយសង្រ្គាមការពារខ្លួនមួយនេះ បន្តប្រឆាំងនឹងការវាយរុលកាន់តែខ្លាំងរបស់រុស្ស៊ី។

ក្រុមមន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះទាំងពីររូបនេះបន្តថា គ្រាប់កាំភ្លើងធំទំហំ ១៥៥មីលីម៉ែត្រ និងមីស៊ីល GMLRS (ប្រព័ន្ធកាំភ្លើងធំចល័ត) ឥឡូវនេះត្រូវផ្តល់ឱ្យអ៊ុយក្រែន។ ប្រភពមិនបានបញ្ជាក់ទេថា តើសព្វាវុធប៉ុន្មានត្រូវបញ្ជូនឱ្យអ៊ុយក្រែន ឬក៏ថា តើការដឹកជញ្ជូនត្រូវបានបញ្ចប់ ឬយ៉ាងណាទេ។ ភ្លាមៗនេះ សេចក្ដីលម្អិតផ្លូវការបន្ថែមពុំទាន់មាននៅឡើយ។

ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលថ្ងៃអង្គារថា លោកបញ្ជាឱ្យបង្កើនទំនាក់ទំនងជាមួយអាមេរិក ដើម្បីធានាបាននូវការចែកចាយគ្រឿងផ្គត់ផ្គង់យោធាសំខាន់ៗ ជាពិសេសប្រព័ន្ធការពារដែនអាកាស។ ចំណែកលោក Trump និយាយថា លោកនឹងពិចារណាបញ្ជូនមីស៊ីលការពារដែនអាកាស Patriot ទៅឱ្យអ៊ុយក្រែន ប៉ុន្តែមិនបញ្ជាក់ពីពេលវេលានោះទេ។

គួរឱ្យដឹងថា ការដឹកជញ្ជូនដែលត្រូវបានផ្អាកកាលពីសប្តាហ៍មុន រួមមានមីស៊ីល Patriot ចំនួន ៣០គ្រាប់ គ្រាប់ផ្លោងកាំភ្លើងធំទំហំ ១៥៥មីលីម៉ែត្រចំនួន ៨.៥០០គ្រាប់ មីស៊ីល GMLRS កំណត់គោលដៅជាង ២៥០គ្រាប់ និងមីស៊ីល Hellfire ចំនួន ១៤២គ្រាប់ផងដែរ៕