ប្រធានាធិបតីអាមេរិក លោក Donald Trump បានប្រកាសជាផ្លូវការនៅថ្ងៃពុធ (០៩ កក្កដា) អំពីការដំឡើងពន្ធ ៥០% លើទង់ដែង ដោយនិយាយនៅលើប្រព័ន្ធផ្សព្វផ្សាយសង្គមថា ពន្ធដ៏ច្រើនថ្មីនេះនឹងមានប្រសិទ្ធភាពនៅថ្ងៃទី០១ ខែសីហា តទៅ ហើយការសម្រេចចិត្តនេះត្រូវបានធ្វើឡើង បន្ទាប់ពីការវាយតម្លៃសន្តិសុខជាតិ។

នៅក្នុងការសារបង្ហោះអំពីពន្ធទង់ដែងលើបណ្ដាញសង្គម Truth Social លោក Trump បាននិយាយថា៖ "ទង់ដែងគឺចាំបាច់ណាស់សម្រាប់បន្ទះឈីបពាក់កណ្ដាលចម្លង, យន្តហោះ, នាវា, គ្រាប់រំសេវ, មជ្ឈមណ្ឌលទិន្នន័យ, អាគុយលីចូម-អ៊ីយ៉ុង, ប្រព័ន្ធរ៉ាដា, ប្រព័ន្ធការពារមីស៊ីល និងសូម្បីតែសព្វាវុធល្បឿនលឿនជាងសំឡេង ដែលសហរដ្ឋអាមេរិក កំពុងតែសាងសង់ជាច្រើន"។

លោក Trump បានប្តេជ្ញាថា សហរដ្ឋអាមេរិក "ជាថ្មីម្តងទៀត នឹងសាងសង់ឧស្សាហកម្មទង់ដែងដ៏មានឥទ្ធិពលបំផុត"។ លោក Trump បានផ្តល់សញ្ញាកាលពីថ្ងៃអង្គាររួចមកហើយថា លោកកំពុងរៀបផែនការដាក់ពន្ធថ្មីលើទង់ដែង ដោយបានបញ្ជូនភាគហ៊ុនទង់ដែង Comex របស់អាមេរិក ឱ្យឡើងដល់កម្រិតកំណត់ត្រាខ្ពស់បំផុត។

យោងតាមទិន្នន័យស្ទាបស្ទង់ភូគព្ភសាស្ត្ររបស់សហរដ្ឋអាមេរិកបានបង្ហាញថា ទង់ដែងគឺជាលោហៈទី៣ ដែលត្រូវបានប្រើប្រាស់យ៉ាងទូលំទូលាយបំផុតនៅទូទាំងពិភពលោក ហើយសហរដ្ឋអាមេរិក បាននាំចូលស្ទើរតែពាក់កណ្តាលនៃទំនិញដែលខ្លួនប្រើប្រាស់ — ភាគច្រើនមកពីប្រទេសឈីលី៕