ប្រធានាធិបតីអាមេរិក លោក Donald Trump បានបង្វែរកំហឹងពាណិជ្ជកម្មរបស់លោកប្រឆាំងនឹងប្រេស៊ីល កាលពីថ្ងៃពុធ (០៩ កក្កដា) ដោយគំរាមកំហែងដល់សេដ្ឋកិច្ចធំបំផុតរបស់អាមេរិកឡាទីនមួយនេះ ជាមួយនឹងការដាក់ទណ្ឌកម្មពន្ធ ៥០% លើការនាំចេញទៅកាន់សហរដ្ឋអាមេរិក និងបញ្ជាឱ្យបើកការស៊ើបអង្កេតលើការអនុវត្តពាណិជ្ជកម្មបែបអយុត្តិធម៌ ដែលអាចនាំឱ្យមានការតម្លើងដំឡើងពន្ធកាន់តែខ្ពស់ថែមទៀត។

លោក Trump កំណត់អត្រាពន្ធថ្ងៃទី០១ ខែសីហា - ដោយខ្ពស់ជាងពន្ធ ១០% ដែលបានដាក់លើប្រេស៊ីល នៅថ្ងៃទី០២ ខែមេសា - នៅក្នុងលិខិតពន្ធមួយផ្ញើជូនលោកប្រធានាធិបតីប្រេស៊ីល Luiz Inacio Lula da Silva។ ប្រធានាធិបតីអាមេរិករូបនេះបានបង្កើនការរិះគន់លើប្រេស៊ីលក្នុងបណ្ដាញសង្គម ហើយលោកក៏បញ្ជាការិយាល័យតំណាងពាណិជ្ជកម្មអាមេរិក ឱ្យបើកការស៊ើបអង្កេតលើការអនុវត្តពាណិជ្ជកម្មអយុត្តិធម៌លើគោលនយោបាយប្រេស៊ីល ក្រោមមាត្រាទី៣០១ នៃច្បាប់ពាណិជ្ជកម្មឆ្នាំ១៩៧៤។

គួរឱ្យដឹងថា ប្រេស៊ីលជាដៃគូពាណិជ្ជកម្មធំជាងគេទី១៥ របស់សហរដ្ឋអាមេរិក ជាមួយនឹងពាណិជ្ជកម្មទ្វេភាគីសរុបចំនួន ៩២ពាន់លានដុល្លារក្នុងឆ្នាំ២០២៤ និងអតិរេកពាណិជ្ជកម្មដ៏កម្រចំនួន ៧,៤ពាន់លានដុល្លារ។ ប៉ុន្តែលិខិតពន្ធរបស់លោក Trump ទៅកាន់លោក Lula មានភាសាដូចគ្នាទៅនឹងលិខិតទម្រង់មុន ដែលពិពណ៌នាអំពីទំនាក់ទំនងពាណិជ្ជកម្មរបស់ប្រេស៊ីល ថា "អយុត្តិធម៌ខ្លាំងណាស់"។

ប៉ុន្មានថ្ងៃមកនេះ លោក Trump បានគំរាមកំហែងពន្ធបន្ថែម ១០% លើក្រុមប្រទេស BRICS ដែលប្រេស៊ីលគឺជាសមាជិកដ៏សំខាន់មួយ ហើយលោកប្រធានាធិបតីប្រេស៊ីល Lula បានរិះគន់ខ្លាំងៗលើការគំរាមកំហែងនេះ ដោយប្រាប់អ្នកកាសែតនៅជំនួបកំពូល BRICS កាលពីថ្ងៃចន្ទសប្ដាហ៍នេះថា ពិភពលោកមិនចង់បានអធិរាជនោះទេ៕