នៅពេលមានការវិលត្រឡប់ទៅប្រទេសកំណើតវិញកាន់តែច្រើនឡើងនៃជនភៀសខ្លួនអាហ្វហ្គានីស្ថាន ពីប្រទេសជិតខាង បណ្ដាទីភ្នាក់ងារមនុស្សធម៌កំពុងបង្កើនការជូនដំណឹងអាសន្នអំពីវិបត្តិដែលកំពុងកើនឡើងយ៉ាងធ្ងន់ធ្ងរ ដោយសារកង្វះធនធាន ហានិភ័យនៃការការពារ និងការរំពឹងទុកមិនច្បាស់លាស់សម្រាប់ការធ្វើសមាហរណកម្មឡើងវិញ។

កំណើនអ្នកវិលទៅវិញនេះ កើតឡើងបន្ទាប់ពីកិច្ចខិតខំប្រឹងប្រែងដាច់ដោយឡែកពីគ្នាដោយអ៊ីរ៉ង់ និងប៉ាគីស្ថាន ក្នុងការបណ្តេញជនបរទេសដែលមិនមានឯកសារ ជាពិសេសជនជាតិអាហ្វហ្គានីស្ថាន ដោយប្រទេសទាំងពីរបានដាក់ពេលវេលាកំណត់ និងការព្រមាននិរទេស សម្រាប់ជនភៀសខ្លួនណាដែលមិនព្រមចាកចេញដោយស្ម័គ្រចិត្ត។

យោងតាមទីភ្នាក់ងារជនភៀសខ្លួនអង្គការសហប្រជាជាតិ UNHCR បានឱ្យដឹងថា ជនជាតិអាហ្វហ្គានីស្ថានជាង ១,២លាននាក់ បានវិលត្រឡប់ ឬត្រូវបង្ខំឱ្យវិលត្រឡប់ទៅប្រទេសកំណើតចេញពីអ៊ីរ៉ង់ និងប៉ាគីស្ថាន រហូតមកបច្ចុប្បន្ននៅក្នុងឆ្នាំនេះ។

ដោយសម្អាងដល់តួលេខរបស់ UNHCR លោក Sami Fakhouri ប្រធានគណៈប្រតិភូសម្រាប់សហព័ន្ធអន្តរជាតិនៃកាកបាទក្រហម និងសង្គមអឌ្ឍចន្ទក្រហម (IFRC) នៅអាហ្វហ្គានីស្ថាន បាននិយាយថា ប្រជាជនអាហ្វហ្គានីស្ថានរាប់ម៉ឺននាក់ កំពុងឆ្លងព្រំដែនក្នុងមួយថ្ងៃ ដោយធ្វើឱ្យការធ្វើសមាហរណកម្មឡើងវិញក្លាយជា "កិច្ចប្រឹងប្រែងយ៉ាងលំបាក" នៅក្នុងប្រទេសដែលកំពុងប្រឈមមុខនឹងការលំបាកផ្នែកសេដ្ឋកិច្ច និងអត្រាអត់ការងារធ្វើខ្ពស់រួចទៅហើយ៕