ក្រុមឧទ្ទាមហួទីគាំទ្រដោយអ៊ីរ៉ង់នៅប្រទេសយេម៉ែន បានអះអាងទទួលខុសត្រូវសម្រាប់ការវាយប្រហារ ដែលបានធ្វើឲ្យលិចនាវាពាណិជ្ជកម្មមួយគ្រឿងកាលពីដើមសប្តាហ៍នេះ ជាការវាយប្រហារលើកទីពីររបស់ក្រុមនេះលើការដឹកជញ្ជូននៅសមុទ្រក្រហមក្នុងរយៈពេល២៤ម៉ោងខណៈពួកគេបានបន្តយុទ្ធនាការឡើងវិញនៅលើផ្លូវទឹកដ៏សំខាន់នេះ។

ស្ថានទូតសហរដ្ឋអាមេរិកបាននិយាយថា ក្រុមឧទ្ទាមហ៊ូទី បានចាប់ពង្រត់ទាហានជើងទឹកចេញពីនាវាដែលពួកគេបានវាយប្រហារ។ នាវា Eternity C ជានាវាដោតទង់ជាតិប្រទេសលីបេរីយ៉ា ត្រូវបានបំផ្លាញធ្ងន់ធ្ងរនៅក្នុងការវាយប្រហារដែលបានចាប់ផ្តើមកាលពីថ្ងៃចន្ទ និងបន្តរហូតដល់ថ្ងៃអង្គារ មុនពេលនាវាបានលិច។

ក្រុមឧទ្ទាមនៅប្រទេសយេម៉ែន បានអះអាងទទួលខុសត្រូវចំពោះការវាយប្រហារនេះ ដែលបានកើតឡើងបន្ទាប់ពីពួកគេបានឡើងជិះ និងបានពន្លិចនាវា Magic Seas ជាការវាយប្រហារលើកដំបូងរបស់ក្រុមហួទីលើនាវាដឹកជញ្ជូននៅឆ្នាំនេះ។

អ្នកនាំពាក្យយោធាក្រុមហួទី លោក Yahya Saree បាននិយាយថា «កម្លាំងទាហានជើងទឹកនៃកងកម្លាំងប្រដាប់អាវុធយេម៉ែន បានកំណត់គោលដៅលើនាវា Eternity C ដោយអះអាងថា នាវានេះត្រូវធ្វើដំណើរទៅកាន់កំពង់ផែ Eilat របស់អ៊ីស្រាអែល ហើយត្រូវបានវាយប្រហារដើម្បីគាំទ្រដល់ប្រជាជនប៉ាឡេស្ទីននៅក្នុងតំបន់ ហ្កាហ្សា។