មន្ត្រីជាន់ខ្ពស់មួយរូបរបស់អ៊ីស្រាអែលបាននិយាយកាលពីថ្ងៃពុធសប្ដាហ៍នេះថា អ៊ីស្រាអែល និងក្រុមហាម៉ាស អាចឈានដល់បទឈប់បាញ់នៅហ្កាហ្សា និងកិច្ចព្រមព្រៀងដោះលែងចំណាប់ខ្មាំងក្នុងរយៈពេលមួយឬពីរសប្តាហ៍ទៀត ទោះកិច្ចព្រមព្រៀងមួយមិនទំនងត្រូវបានធានាភ្លាមៗក៏ដោយ ។

ថ្លែងក្នុងអំឡុងដំណើរទស្សនកិច្ចរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ទៅកាន់ទីក្រុងវ៉ាស៊ីនតោន មន្ត្រីរូបនេះបាននិយាយថា ប្រសិនបើភាគីទាំងពីរយល់ព្រមលើបទឈប់បាញ់រយៈពេល ៦០ ថ្ងៃនោះ អ៊ីស្រាអែលនឹងប្រើប្រាស់ពេលវេលានោះដើម្បីជំរុញឱ្យមានបទឈប់បាញ់ជាអចិន្ត្រៃយ៍ ព្រមទាំងការរំសាយអាវុធរបស់ក្រុមហាម៉ាសដែរ។

មន្ត្រីរូបនេះបាននិយាយដោយសុំមិនបញ្ចេញឈ្មោះថា ប្រសិនបើក្រុមហាម៉ាសបដិសេធ យើងនឹងបន្តប្រតិបត្តិការយោធា ។

មន្ត្រីដដែលក៏បានបង្ហាញដែរថា មុនពេលការវាយប្រហាររបស់អ៊ីស្រាអែលលើប្រទេសអ៊ីរ៉ង់នាពេលថ្មីៗនេះ របាយការណ៍ចារកម្មបានបង្ហាញថា សារធាតុអ៊ុយរ៉ានីញ៉ូមដែលចម្រាញ់បាន បានបន្តស្តុកទុកនៅទីតាំង Fordow, Natanz និង Isfahan ហើយមិនត្រូវបានផ្លាស់ប្តូរទីតាំងនោះទេ។

ការធ្វើបច្ចុប្បន្នភាពនេះ កើតឡើង ស្របពេលក្រុមហាម៉ាស បានបញ្ជាក់ថាខ្លួនបានរៀបចំដើម្បីដោះលែងចំណាប់ខ្មាំង១០ នាក់ ហើយថាកិច្ចចរចាបទឈប់បាញ់នៅតែតឹងតែងដោយសារតែការវាយលុករបស់អ៊ីស្រាអែល។   

លោក អ៊ីយ៉ាល់ ហ្សាមៀ (Eyal Zamir) ប្រធានបុគ្គលិកនៃកងកម្លាំងការពារអ៊ីស្រាអែល (IDF) បានប្រាប់សារព័ត៌មានអ៊ីស្រាអែលថា លក្ខខណ្ឌនានា ត្រូវបានបង្កើតឡើងដើម្បីពន្លឿនកិច្ចព្រមព្រៀង ឈានទៅបញ្ចប់ជម្លោះក្នុងដែនដីឆ្នេរសមុទ្រមួយនេះ និងនាំចំណាប់ខ្មាំងត្រឡប់មកវិញ ខណៈដែលលោក Trump និយាយថា បទឈប់បាញ់អាចកើតឡើងនៅសប្ដាហ៍នេះឬសប្ដាហ៍ក្រោយ៕