សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន នៅក្នុងជំនួបថ្ងៃព្រហស្បតិ៍ (១០ កក្កដា) នេះ បានជំរុញឱ្យគ្រប់ភាគីទាំងអស់ធ្វើសកម្មភាពប្រកបដោយ "ពុទ្ធិ និងការប្រុងប្រយ័ត្ន" ដើម្បីរក្សាឱ្យបាននូវសន្តិភាព និងសន្តិសុខក្នុងសមុទ្រចិនខាងត្បូង ដោយព្រមានថា ការរំខានណាមួយចំពោះផ្លូវទឹកដ៏សំខាន់នេះអាចជះឥទ្ធិពលដ៏មហន្តរាយដល់ពាណិជ្ជកម្មពិភពលោក។

អាស៊ានបានពឹងផ្អែកលើក្រុងវ៉ាស៊ីនតោនជាយូរមកហើយ ក្នុងនាមជាសមតុល្យសន្តិសុខចំពោះការអះអាងសិទ្ធិរបស់ក្រុងប៉េកាំងនៅសមុទ្រចិនខាងត្បូង ខណៈបច្ចុប្បន្ន តំបន់នេះកំពុងខិតទៅជិតចិន ដែលជាប្រទេសមហាអំណាចអាស៊ី ដើម្បីជំរុញពាណិជ្ជកម្ម និងទប់ស្កាត់ផលប៉ះពាល់ពីការផាកពិន័យពន្ធអាមេរិក រហូតដល់ ៤០% ដែលលោកប្រធានាធិបតីអាមេរិក Donald Trump បាននិយាយថា នឹងចាប់ផ្តើមនៅថ្ងៃទី០១ ខែសីហា ខាងមុខ។

អាស៊ានបានព្រមាននៅថ្ងៃព្រហស្បតិ៍ថា ទោះជាស្ថានការណ៍បែបនេះក៏ដោយ អាស៊ីអាគ្នេយ៍កំពុងប្រឈមនឹងហានិភ័យពិតប្រាកដពីការកើនឡើងនៃភាពមិនច្បាស់លាស់ជាសកល និងភាពតានតឹងភូមិសាស្ត្រនយោបាយ ដែលអាចអង្រួនសន្តិភាព និងស្ថិរភាពក្នុងតំបន់។

ថ្លែងនៅក្នុងសុន្ទរកថាបើកកិច្ចប្រជុំអាស៊ាន-ចិន នៅទីក្រុងកូឡាឡាំពួរ រដ្ឋមន្ត្រីការបរទេសម៉ាឡេស៊ី លោក Mohamad Hasan បាននិយាយថា៖ ដោយសារតែភាពមិនច្បាស់លាស់ទាំងនោះហើយ ទើបភាគីគ្រប់គ្នាត្រូវធានាថា ភាពតានតឹងភូមិសាស្ត្រនយោបាយមិនកើនឡើង ឬគំរាមកំហែងធ្វើឱ្យខូចសន្តិសុខ និងពាណិជ្ជកម្មសកលនៅសមុទ្រចិនខាងត្បូង។ លោកបន្តថា "អាស៊ានអំពាវនាវដល់ភាគីទាំងអស់ឱ្យគ្រប់គ្រងស្ថានការណ៍នៅសមុទ្រចិនខាងត្បូង ប្រកបដោយពុទ្ធិ និងការប្រុងប្រយ័ត្ន"៕