របាយការណ៍ប្រព័ន្ធផ្សព្វផ្សាយបាននិយាយថា កិច្ចខិតខំប្រឹងប្រែងជួយសង្គ្រោះបានបន្តនៅថ្ងៃព្រហស្បតិ៍ (១០ មិថុនា) នេះក្នុងប្រទេសនេប៉ាល់ ដើម្បីជម្លៀសប្រជាជនដែលជាប់គាំងនៅក្នុងតំបន់រងគ្រោះដោយទឹកជំនន់ បន្ទាប់ពីភ្លៀងមូសុងបានបង្កឱ្យមានការជន់លិចនៅក្នុងស្រុក Rasuwa ដែលបានបណ្តាលឱ្យមនុស្សយ៉ាងតិច ៩នាក់ស្លាប់ និងជិត ២០នាក់បាត់ខ្លួន។

លោក Arjun Paudel ប្រធានមន្រ្តីស្រុក Rasuwa បានប្រាប់សារព័ត៌មានថា ក្រុមមន្រ្តីត្រូវបានដាក់ពង្រាយយ៉ាងពេញលេញនៅទីតាំងកើតហេតុ ហើយបានជួយសង្គ្រោះបុគ្គលជាង ១៥០នាក់ រួមទាំងជនបរទេសចំនួន ១២៧នាក់ ដោយបញ្ជូនពួកគេតាមយន្តហោះទៅកាន់ទីក្រុងកដ្ឋមណ្ឌូ។

នគរបាលនេប៉ាល់បាននិយាយថា ប្រតិបត្តិការស្វែងរកក៏កំពុងបន្តសម្រាប់មនុស្ស ១៩នាក់ ដែលបានបាត់ខ្លួន បន្ទាប់ពីទឹកជំនន់ដ៏ធំកាលពីព្រឹកថ្ងៃអង្គារសប្ដាហ៍នេះ។ ទឹកជំនន់យ៉ាងគំហុក ដែលបានវាយប្រហារផ្នែកខ្លះនៃស្រុក Rasuwa នេះ មានចម្ងាយ ១២០គីឡូម៉ែត្រភាគឦសាននៃទីក្រុងកដ្ឋមណ្ឌូ និងបានបោកបក់ "ស្ពានមិត្តភាព" ដែលតភ្ជាប់ប្រទេសនេះទៅកាន់ប្រទេសចិន។

អគ្គនាយកអាជ្ញាធរកាត់បន្ថយ និងគ្រប់គ្រងគ្រោះមហន្តរាយជាតិ (NDRRMA) របស់នេប៉ាល់ បានឱ្យដឹងថា ទឹកជំនន់នេះអាចបណ្តាលមកពីការលេចធ្លាយទឹកយ៉ាងគំហុកពីបឹងទឹកកក ដែលមានទីតាំងនៅជិតព្រំដែននេប៉ាល់-ចិន ព្រោះដោយសារមិនសូវមានភ្លៀងធ្លាក់ខ្លាំងក្លាទេនៅពេលមានទឹកជំនន់ ទាំងសងខាងនៃព្រំដែន៕