រដ្ឋមន្ត្រីសុខាភិបាលអ៊ីរ៉ង់ លោក Mohammad-Reza Zafarghandi បាននិយាយថា ជនស៊ីវិលជិត ៧០០នាក់ ត្រូវបានសម្លាប់ នៅក្នុងការវាយប្រហាររបស់អ៊ីស្រាអែលលើប្រទេសអ៊ីរ៉ង់ ក្នុងអំឡុងថ្ងៃទី ១៣-២៤ ខែមិថុនា។

លោកបានធ្វើការអត្ថាធិប្បាយនេះ នៅក្នុងសុន្ទរកថាទៅកាន់អ្នកសារព័ត៌មាន ក្នុងដំណើរទស្សនកិច្ចទៅកាន់មជ្ឈមណ្ឌលវេជ្ជសាស្ត្រ ក្នុងរដ្ឋធានីតេហេរ៉ង់របស់អ៊ីរ៉ង់ កាលពីថ្ងៃអង្គារ។ នេះបើយោងតាមក្រសួងសុខាភិបាល។

រដ្ឋមន្ត្រីអ៊ីរ៉ង់រូបនេះ បាននិយាយថា ជនស៊ីវិលជិត ៥.០០០នាក់ ក៏បានរងរបួស នៅក្នុងការវាយប្រហាររបស់អ៊ីស្រាអែលផងដែរ ដោយបន្ថែមថា សមាជិកបុគ្គលិកពេទ្យ ១៨នាក់ ក្នុងនោះមានគ្រូពេទ្យ ៦នាក់ ស្ថិតក្នុងចំណោមអ្នកដែលត្រូវបានសម្លាប់នៅក្នុងការវាយប្រហារតាមអាកាស។

លោក Zafarghandi បានអះអាងថា មន្ទីរពេទ្យចំនួន ៧ នៅក្នុងប្រទេស ត្រូវបានកំណត់ជាគោលដៅ ផ្ទាល់ដោយអ៊ីស្រាអែល ហើយមជ្ឈមណ្ឌលវេជ្ជសាស្ត្រមួយចំនួន ត្រូវបានជម្លៀសចេញ ដោយសារតែស្ថានភាពសង្គ្រោះបន្ទាន់។

លោកបានសង្កត់ធ្ងន់ថា អ៊ីស្រាអែលក៏បានវាយប្រហារបំផ្លាញរថយន្តសង្គ្រោះចំនួន ១១គ្រឿងដែរ ដោយលោកបានបន្ថែមថា រាល់សកម្មភាពរបស់អ៊ីស្រាអែលទាំងនោះ គឺរំលោភលើគោលការណ៍ និងច្បាប់អន្តរជាតិ និងសិទ្ធិមនុស្ស។

កាលពីថ្ងៃទី ១៣ ខែមិថុនា អ៊ីស្រាអែលបានបើកការវាយប្រហារតាមអាកាសដ៏ធំលើតំបន់ជាច្រើន ក្នុងប្រទេសអ៊ីរ៉ង់ រួមទាំងទីតាំងនុយក្លេអ៊ែរ និងយោធា ដោយបានសម្លាប់មេបញ្ជាការជាន់ខ្ពស់ អ្នកវិទ្យាសាស្ត្រនុយក្លេអ៊ែរ និងជនស៊ីវិលជាច្រើននាក់។ អ៊ីរ៉ង់បានឆ្លើយតបនឹងការវាយប្រហារដោយមីស៊ីល និងយានដ្រូន ទៅលើអ៊ីស្រាអែល ដោយបានបណ្តាលឲ្យមានអ្នកស្លាប់និងរបួស និងការខូចខាតទ្រព្យសម្បត្តិ។