កូរ៉េខាងត្បូង៖ យោធាកូរ៉េខាងត្បូង និងជប៉ុនបាននិយាយថា កូរ៉េខាងជើងបានបាញ់គ្រាប់ផ្លោងដែលទំនងជាមីស៊ីល ចូលទៅក្នុងដែនទឹកភាគខាងកើតរបស់ខ្លួននៅថ្ងៃពុធនេះ ដែលជាការបាញ់លើកដំបូងក្នុងរយៈពេលប្រហែលពីរខែ ខណៈទំនាក់ទំនងការទូតអន្តរជាតិស្ងប់ស្ងាត់មួយរយៈពេលវែងស្ដីពីកម្មវិធីនុយក្លេអ៊ែររបស់កូរ៉េខាងជើង។
ការបាញ់ផ្លោងចុងក្រោយនេះបានកើតឡើង បន្ទាប់ពីមេដឹកនាំកូរ៉េខាងជើងលោក Kim Jong Un បានប្ដេជ្ញាបង្កើនសមត្ថភាពយោធារបស់ខ្លួនបន្ថែមទៀត នៅក្នុងសន្និសីទគណបក្សកាន់អំណាចកាលពីសប្ដាហ៍មុន។ នាយសេនាធិការចម្រុះរបស់កូរ៉េខាងត្បូងបាននិយាយថា កូរ៉េខាងជើងបានបាញ់មីស៊ីលឆ្ពោះទៅកាន់ដែនទឹកភាគខាងកើតរបស់ខ្លួននៅព្រឹកថ្ងៃពុធនេះ តែពុំបានផ្តល់ព័ត៌មានលម្អិតបន្ថែមទេ។ ក្រសួងការពារជាតិជប៉ុនបាននិយាយនៅព្រឹកថ្ងៃពុធនេះថា ប្រទេសកូរ៉េខាងជើងបានបាញ់អ្វីដែលទំនងជាមីស៊ីល តែក្រសួងនេះមិនបានបង្ហាញព័ត៌មានលម្អិតផ្សេងទៀតនោះទេ។ ការបាញ់ផ្លោងនៅព្រឹកថ្ងៃពុធគឺជាការបាញ់លើកដំបូង ចាប់តាំងពីប្រទេសកូរ៉េខាងជើងបានសាកល្បងអាវុធដែលទើបបង្កើតថ្មីនៅចន្លោះខែកញ្ញាដល់ខែវិច្ឆិកា រួមទាំងមីស៊ីលដែលមានសមត្ថភាពបំពាក់ក្បាលគ្រាប់នុយក្លេអ៊ែរ ដែលធ្វើឲ្យកូរ៉េខាងត្បូង និងជប៉ុនដែលជាសម្ព័ន្ធមិត្តសំខាន់របស់សហរដ្ឋអាមេរិកព្រួយបារម្ភខ្លាំង។ អ្នកជំនាញខ្លះបាននិយាយថា កូរ៉េខាងជើងកំពុងដាក់សម្ពាធបន្ថែមទៀតលើគូប្រជែងរបស់ខ្លួន ដើម្បីទទួលស្គាល់ថា ខ្លួនជារដ្ឋថាមពលនុយក្លេអ៊ែរ និងដើម្បីបន្ធូរបន្ថយទណ្ឌកម្មអន្តរជាតិលើប្រទេសនេះ។
រដ្ឋបាលលោក Biden បាននិយាយម្តងហើយម្តងទៀតថា ខ្លួនបើកចំហរក្នុងការបន្តការទូតនុយក្លេអ៊ែរជាមួយកូរ៉េខាងជើង "គ្រប់ទីកន្លែង និងគ្រប់ពេលវេលា" ដោយគ្មានបុរេលក្ខខណ្ឌ។ រហូតមកដល់ពេលនេះ កូរ៉េខាងជើងបានច្រានចោលដោយនិយាយថា គោលនយោបាយអរិភាពរបស់សហរដ្ឋអាមេរិកនៅតែមិនផ្លាស់ប្ដូរ។ ចំណែកលោកនាយករដ្ឋមន្ត្រីជប៉ុន Fumio Kishida បាននិយាយថា ពួកលោកបានដឹងថា វាពិតជាគួរសោកស្ដាយខ្លាំងណាស់ ដែលកូរ៉េខាងជើងនៅតែបន្តបាញ់មីស៊ីលរហូតមកដល់ពេលនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
