កងទ័ពរបស់កោះតៃវ៉ាន់ នៅថ្ងៃព្រហស្បតិ៍ (១០ កក្កដា) នេះ បានបង្អួតកម្លាំងរថក្រោះ M1A2T Abrams ដំបូងរបស់ខ្លួនផលិតដោយសហរដ្ឋអាមេរិក ដែលជាគ្រឿងយុទ្ធោបករណ៍ចំណាស់មួយដែលអ្នកវិភាគនិយាយថា នឹងត្រូវការការពារកាន់តែខ្លាំងឡើងប្រឆាំងនឹងយានដ្រូននៅក្នុងការប្រយុទ្ធនាពេលអនាគតដោយសារតែមេរៀនពីសង្គ្រាមអ៊ុយក្រែន។

រថក្រោះ Abrams ចំនួន ៤គ្រឿង ត្រូវដាក់បង្ហាញថាកំពុងធ្វើសមយុទ្ធនៅទូទាំងទីតាំងហ្វឹកហាត់កងទ័ពក្នុងស្រុក Hsinchu ដោយបាញ់ទៅលើគោលដៅកំពុងផ្លាស់ទី នៅក្នុងថ្ងៃទីពីរនៃសមយុទ្ធយោធា Han Kuang ប្រចាំឆ្នាំរយៈពេល ១០ថ្ងៃរបស់កោះតៃវ៉ាន់ ដែលត្រូវរៀបចំឡើងដើម្បីសាកល្បងភាពធន់របស់កោះនេះក្នុងការទប់ទល់សម្ពាធពីប្រទេសចិន។

រថក្រោះទាំងនោះស្ថិតក្នុងចំណោមយានប្រយុទ្ធដ៏សំខាន់របស់ក្រុម Abrams ចំនួន ៣៨គ្រឿង ដែលបានចែកចាយក្នុងខែធ្នូ ជាមួយនឹងយាន ១០៨គ្រឿងទៀតត្រូវបញ្ជាទិញដោយតៃវ៉ាន់ ហើយនឹងត្រូវដឹកជញ្ជូននៅចុងឆ្នាំនេះ និងឆ្នាំក្រោយ។ ក្នុងឈុតប្រយុទ្ធ មេដឹកនាំកោះ លោក Lai Ching-te បានសង្កេតឃើញការបាញ់សាកល្បងនេះ ហើយបាននិយាយថា "រៀងរាល់ការកើនឡើងនៃអំណាចប្រយុទ្ធរបស់យោធាតៃវ៉ាន់ កោះនេះអាចទទួលបានស្រទាប់សន្តិសុខបន្ថែមទៀត"។

ប្រទេសចិន ដែលចាត់ទុកកោះស្វ័យគ្រប់គ្រងនេះថាជាទឹកដីរបស់ខ្លួន និងបង្កើនសាច់ដុំយោធាជុំវិញកោះ បានរិះគន់ខ្លាំងៗលើសមយុទ្ធប្រចាំឆ្នាំនេះដោយនិយាយថា មិនថាអាជ្ញាធរតំបន់តៃវ៉ាន់ប្រឹងធ្វើសមយុទ្ធប៉ុន្មានដងនោះទេ ក៏មិនអាចផ្លាស់ប្តូរការបរាជ័យដែលជៀសមិនរួច នៃការប៉ុនប៉ងឯករាជ្យភាពកោះតៃវ៉ាន់បានដែរ៕