រដ្ឋាភិបាលប្រទេសស៊ូដង់ខាងត្បូងបាននិយាយថា មនុស្ស៨នាក់ដែលត្រូវបាននិរទេសចេញពីសហរដ្ឋអាមេរិក បានទៅដល់រដ្ឋធានីប្រទេសស៊ូដង់ខាងត្បូង ហើយបច្ចុប្បន្ននេះស្ថិតនៅក្រោមការយកចិត្តទុកដាក់ពីអាជ្ញាធរ។ 

បុរសទាំងនេះមានមកពីប្រទេសគុយបា ឡាវ ម៉ិកស៊ិក មីយ៉ាន់ម៉ា ស៊ូដង់ វៀតណាម និងស៊ូដង់ខាងត្បូង ត្រូវបានឃុំខ្លួនក្នុងមន្ទីរឃុំឃាំងរបស់សហរដ្ឋអាមេរិក នៅមូលដ្ឋានយោធាក្នុងទីក្រុង Djibouti មុនពេលត្រូវបានបញ្ជូនទៅទីក្រុង Juba ។

នៅក្នុងសេចក្តីថ្លែងការណ៍ ក្រសួងការបរទេសស៊ូដង់ខាងត្បូងបាននិយាយថា ក្រុមនេះកំពុងត្រូវបានពិនិត្យដោយអនុវត្តតាមច្បាប់ជាតិ និងបទដ្ឋានអន្តរជាតិ។ ការផ្ទេរនេះ ត្រូវបានចាត់ទុកថាជា «កាយវិការនៃសុច្ឆន្ទៈ» ជាផ្នែកមួយនៃកិច្ចសហប្រតិបត្តិការកាន់តែទូលំទូលាយជាមួយសហរដ្ឋអាមេរិក។ ប៉ុន្តែចំណាត់ការនេះ បានធ្វើឲ្យមានការព្រួយបារម្ភពីពលរដ្ឋមួយចំនួននៅក្នុងទីក្រុង Juba ដែលបានចោទសួរថាហេតុអ្វីបានជាអ្នកនិរទេសពុំមែនជនជាតិស៊ូដង់ខាងត្បូង ត្រូវបានទទួលយកទាំងអស់។ ពួកគេបានសម្តែងការព្រួយបារម្ភ ដោយព្រមានពីហានិភ័យសន្តិសុខដែលអាចកើតមាននៅក្នុងប្រទេសដែលកំពុងងើបឡើងវិញពីជម្លោះច្រើនឆ្នាំ និងជាអ្វីដែលពួកគេបានពិពណ៌នាថាជាសមត្ថភាពអនុវត្តច្បាប់មានកម្រិត។