ទូរទស្សន៍ Al Jazeera របស់ប្រទេសកាតា បានរាយការណ៍ថា ជនជាតិប៉ាឡេស្ទីនជាង ៧៧០នាក់ ត្រូវបានសម្លាប់ នៅក្នុងតំបន់ហ្កាហ្សាស្ទ្រីប ដែលជាលទ្ធផលនៃការវាយប្រហារលើមជ្ឈមណ្ឌលចែកចាយជំនួយមនុស្សធម៌ ចាប់តាំងពីចុងខែឧសភាមក។

បណ្តាញទូរទស្សន៍នេះ បាននិយាយដោយដកស្រង់សម្តីពីក្រសួងសុខាភិបាលនៃដែនដីប៉ាឡេស្ទីនថា ចាប់តាំងពីថ្ងៃទី ២៧ ខែឧសភាមក ចំនួនមនុស្សស្លាប់នៅកន្លែងនៃមូលនិធិមនុស្សធម៌ហ្កាហ្សា (GHF) ដែលបង្កើតឡើងដោយអ៊ីស្រាអែល សហការជាមួយសហរដ្ឋអាមេរិក ដើម្បីចែកចាយជំនួយមនុស្សធម៌បានកើនលើស ៧៧០នាក់ហើយ។  

សារព័ត៌មាន Al Jazeera បានរាយការណ៍មុននេះថា អង្គការអន្តរជាតិក្នុងប៉ុន្មានសប្តាហ៍ថ្មីៗនេះ បានសម្តែងការព្រួយបារម្ភថា ប្រជាជនហ្កាហ្សាចំនួន ២,១លាននាក់ កំពុងស្វែងរកអាហារដោយអស់សង្ឃឹម ចំពេលការផ្គត់ផ្គង់ពុំមានស្ថិរភាព។ 

នៅថ្ងៃទី ១៨ ខែឧសភា កងទ័ពអ៊ីស្រាអែល បានចាប់ផ្តើមអរិភាពនៅតំបន់ភាគខាងជើង និងភាគខាងត្បូងនៃតំបន់ហ្កាហ្សាស្ទ្រីប ដែលជាផ្នែកនៃប្រតិបត្តិការជើងគោកទ្រង់ទ្រាយធំ Gideon's Chariots។ គោលដៅដែលបានបញ្ជាក់របស់ខ្លួន គឺការកម្ចាត់ក្រុមហាម៉ាសទាំងស្រុង និងការដោះលែងចំណាប់ថ្នូរអ៊ីស្រាអែលទាំងអស់ដែលឃុំខ្លួននៅក្នុងតំបន់នេះ។ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា បន្ទាប់ពីប្រតិបត្តិការនេះ កងទ័ពគ្រោងនឹងគ្រប់គ្រងតំបន់ហ្កាហ្សាស្ទ្រីបទាំងមូល។